سەرۆک وەزیران عێراق پەیوەندییەکی تەلەفۆنی لەگەڵ سەرۆکی سووریا ئەنجام دا، پرسە و سەرەخۆشی ئاراستە کرد و ئاماژەی بەوە دا کە هاوکاری پێشکەش بە قوربانییانی بوومەلەرزە دەکات.
محەمەد شیاع سوودانی سەرۆکی ئەنجوومەنی وەزیران، ئەمڕۆ چوارشەممە 08ـی 02ـی 2023 پەیوەندییەکی تەلەفۆنی لەگەڵ بەشار ئەسەد سەرۆکی سووریا ئەنجام دا و پرسە وسەرەخۆشی خۆی بۆ قوربانییانی بوومەلەرزەکەی بەرەبەیانی ڕۆژی دووشەممە پێگەیاند، لەمبارەیەوە ڕاگەیاندنی ئەنجوومەنی وەزیران ڕایگەیاند: سوودانی هاوخەمی و پشتگیری گەل و حکوومەت و سەرۆکاتییەکانی عێراقی بۆ گەلی "سووریا و سەرکردایەتییەکە" دەربڕی لەم کارەساتە دڵتەزێنە و داوای لە یەزدانی دلۆڤان کرد قوربانییان بە ڕەحمەتی خۆی شاد بکات و بریندارەکانیش زوو چاکببنەوە.
بەپێی ڕاگەیەنراوی پەیوەندییە تەلەفۆنییەکە سوودانی ڕوونی کردەوە کە عێراق لە سۆنگەی مرۆڤایەتی و هاوبەندی برایەتی کە هەردوو گەلی عێراق و سووریا پێکەوە دەبەستێت، دەستپێشخەری کردووە بۆ پێشکەشکردنی هاریکاری بە برایانی سووری نەک وەکوو مننەت و چاکە، لە بوارەکانی بەرگری شارستانی، ناردنی تیمی پزیشکی، یارمەتی مرۆیی فریاگوزاری، سووتەمەنی، کەلوپەلی تەندروستی و پزیشکی و خۆراک.
ئەوەش خراوەتەڕوو کە سەرۆکی ئەنجوومەنی وەزیرانی عێراق جەختی لە گرنگی ئاسایش و سەقامگیری سووریا و پتەوکردنی پەیوەندییە دووقۆڵییەکانی لە بوارە جیاجیاکان کردەوە.
لای خۆیەوە سەرۆکی سووریا سوپاس و پێزانینی خۆی بۆ حکوومەت و گەلی عێراق دەربڕی بۆ ئەم دەستپێشخەرییەی هاریکاری و پشتگیریکردن و بوونی پەیوەندییەکی دووقۆڵی پتەوی نێوان هەردوو وڵاتی برا دووپات کردەوە.
هاوکات ئەمڕۆ چوارشەممە، لە کۆبوونەوەی ئەنجوومەنی وەزیرانی هەرێمی کوردستان بە سەرپەرشتی مه‌سرور بارزانی، وێڕای پرسە و سەرەخۆشی جەخت کرایەوە لە چەند ڕۆژی ڕابردوودا یەکەمین کاروانی فریاگوزاری و هاوکاری هەرێم گەیەنرایە تورکیا و پرۆسەکەش بەردەوام دەبێت، هه‌روه‌ها لە هەمانکاتیشدا ڕێکاری پێویست گیراوەتەبەر بۆ ناردنی کاروانی فریاگوزاری بۆ ناوچە زیانلێکەوتووەکانی سووریا.
کۆمێنت (0)
تا ئێستا هیچ کۆمێنتێک نەکراوە.