یەکێتی لاوانی دیموکراتی کوردستان کوردستان ئەمڕۆ پێنجشەممە ڕاگەیەنراوێکی بڵاوکردەوە و تێیدا ئاماژەی بە دامەزراندنی یەکێتییەکان لە 18ی شوباتی 1953 دا و جەختی لەسەر به‌رجه‌سته‌كردنی ماف و داخوازییه‌كانی لاوان کردەوە.
یەکێتی لاوان لە ڕاگەیەنراوەکەدا پیرۆزبای ئاراستەی سەرجەم لاوانی کوردستان و ئەندام و لایەنگرانی کرد و ڕایگەیاند : یه‌كێتییه‌كه‌مان مێژوویەکی پڕ سەروەریی هەبووە لە کاروانی خەباتدا و هەربۆیە دەرباری ڕۆڵی بەرچاوی یەکێتی لاوان جەنابی (بارزانی نەمر) فەرموویەتی: "لاوان شوره‌ی پۆڵایینن بۆ پاراستنی كوردستان."
دەقی ڕاگەیەنراوی یەکێتی لاوانی دیموکراتی کوردستان:-
لە یادی 69 ساڵەی دامه‌زراندنی یه‌كێتی لاوانی دیموكراتی كوردستاندا، پیرۆزبایی گەرم ئاراستەی سه‌رجه‌م لاوانی كوردستان و ئه‌ندام و لایه‌نگرانمان ده‌كه‌ین، به‌م بۆنه‌یه‌وه جه‌خت له‌سه‌ر به‌رجه‌سته‌كردنی ماف و داخوازییه‌كانی لاوان ده‌كه‌ینه‌وه و به‌رده‌وام ده‌بین له خه‌بات و تێكۆشان بۆ ده‌سته‌به‌ركردنی مافی سه‌ربه‌خۆیی خه‌ڵكی كوردستان و سه‌ری ڕێز و نه‌وازش بۆ شه‌هیدانی كوردستان داده‌نه‌وێنین، و درود دەنێرێن بۆ ڕۆحی پاکی شەهیدی سەرکردە کاکە (فەڕەنسۆ هەریری) کە لەم ڕۆژە پیرۆزدا بەدەستی رەشی تیرۆریستان شەهید کرا و گەیشتە کاروانی نەمران، هەروەها سڵاو دەنێرێن بۆ هێزی پێشمه‌رگه‌ی كوردستان و تەواوی هێزەئەمنییەکانی تر و قوربانیدان و شەونخونیان به‌رزده‌نرخێنین.
یه‌كێتییه‌كه‌مان مێژوویەکی پڕ سەروەریی هەبووە لە کاروانی خەباتدا و هەربۆیە دەرباری ڕۆڵی بەرچاوی یەکێتی لاوان جەنابی (بارزانی نەمر) فەرموویەتی: "لاوان شوره‌ی پۆڵایینن بۆ پاراستنی كوردستان" ئێستاش یەکێتی لاوان توانیویەتی خەباتی ئەمڕۆی مەدەنی و کاری ئازادی جه‌ماوه‌ریی و به‌رگریكردن له ماف و داخوازییه‌كانی لاوان به دوێنێوە گرێبدات و بیکاتە ڕێچکەیەکی نەپساوەی بەردەوامبوون و به‌رزی به‌های كاركردن و خۆشه‌ویستی نیشتیمان به‌‌خه‌بات و تێكۆشان ببه‌ستیته‌وه.
ئه‌زموونی کارکردنی یه‌كێتی لاوانی دیموكراتی‌كوردستان، له مێژووی کاری سیاسی و رێکخراوەیی کوردستاندا نموونەیەکی بەرچاو و دیاره و وەک هەمیشە دەستی پێوەدەگرێت و لەخزمەتکردنی بێوچان بەردەوامبێت.
لەم یادە شکۆدارەی 18ی شوبات و بەبۆنەی69ـەمین ساڵرۆژی دامەزراندنی، ده‌مانه‌وێت ئه‌وه بخه‌ینه‌‌ڕوو كه لاوانی كوردستان به هۆشیارییه‌وه، نیشتمان و خاكی خۆیان خۆش ده‌وێت و به‌رگرییه‌كی سه‌رسه‌ختانه‌ی لێ ده‌كه‌ن و له‌م پێناوه‌یشدا چه‌ندین قوربانیمان داوه و بەردەوامیش دەبین تا بەدەستهێنانی تەواوی مافەکانی لاوانی کوردستان.
لاوانی عێراق و كوردستان مێژوویه‌كی هاوبه‌ش له‌نێوانیاندا هه‌یه‌‌و پێكه‌وه په‌ره به پرۆسه‌ی پێكه‌وه‌ژیان و لێبورده‌یی و ئاشتی كۆمه‌ڵایه‌تی ده‌ده‌ین و جه‌خت له‌سه‌ر په‌ره‌پێدانی پرۆسه‌ی پێكه‌وه‌ژیانی نه‌ته‌وه‌یی و ئایینی و یه‌كترقبوڵكردن و ڕێزگرتن له به‌ها سیاسی و كۆمه‌ڵایه‌تی و كەلتوورییه‌كان ده‌كه‌ینه‌وه و هیوادارین بتوانین هەنگاوی باشتر بنێین بۆ خزمەتی لاوان.
یه‌كێتی لاوان، جه‌خت له‌سه‌ر په‌ره‌پێدانی توانا و لێهاتوویی لاوان ده‌كاته‌وه و خوازیارین گشت داموده‌زگەكانی حكوومه‌ت و دامه‌زراوه‌كانی دیكه سوود له توانا مرۆییه‌كانی لاوان وه‌ربگرن و كار بۆ به‌گه‌ڕخستنی تواناكانیان بكرێت بۆ ئەوەی لاوانی ئێمەش سودمەندبن لە کار و پڕۆژەکانی و هاوکاربن لەسەرخستنی پڕۆسەی سیاسی و ئابوری و حوکمڕانی وڵات.
ده‌خوازین به‌دواداچوونی جدیش له مه‌ڕ كێشه و گرفته‌كانی لاوان بكرێت، وه‌كو (بێكاری،نه‌بوونی شوێنی نیشته‌جێبوون و ئاستی گوزه‌رانیان)، هه‌وڵی جدی و كرداری بدرێت بۆ چاره‌سه‌ركردنی ئه‌و كێشانه.
هاوکات خوازیاریشین كێشه‌كانی لاوان به هه‌ند وه‌ربگیرێت و میكانیزمی كرداری
بدۆزرێته‌وه بۆ چاره‌سه‌ركردنیان.
خه‌باتی نیشتیمانی و نه‌ته‌وایه‌تی مافه ڕەواكانی خه‌ڵكی كوردستان له ئامانجه‌كانی یه‌كێتیه‌كه‌ماند‌ا بووه و به‌شێك بووین له شۆڕش و به‌ره‌نگاری و ڕووبه‌ڕووبوونه‌وه‌ی دوژمنانی گه‌لی كوردستان، ئێستاش سه‌ری ڕێز و نه‌وازش بۆ شه‌هیدانی كوردستان داده‌نه‌وێنین سەرقافڵەی شەهیدان (بارزانی نەمر) و (کاک ئیدریسی) هەمیشە لە یاد، سڵاو له پێشمه‌رگه قاره‌مانه‌كانی كوردستان به‌رز و پیرۆزبێت یادی 69 ساڵه‌ی دامه‌زراندنی یه‌كێتیی لاوانی دیموكراتی كوردستان.
17ی شوباتی 2022
مەکتەبی سکرتاریەتی (ی.ل.د.ک)
کۆمێنت (0)
تا ئێستا هیچ کۆمێنتێک نەکراوە.