هانز فلیک دژایەتی خۆی بۆ بیرۆکەی ڕێکخستنی یاریەکانی مۆندیال بۆ هەردوو 2 ساڵ جارێک دەربڕی

 
هانز فلیك ڕاهێنەری هەڵبژاردەی ئەڵمانیا دژایەتی خۆی بۆ بیرۆكەی ڕێكخستنی یاریەكانی مۆندیال بۆ هەردوو ساڵ جارێك دەربڕی.
هانز فلیك بە میدیاكانی وڵاتەكەی ڕاگەیاند كە ئەگەر یاریەكانی جامی جیهان دوو ساڵ جارێك بەڕێوەبچێت ئەوا نەك تەنها دەبێتە فشار بۆ سەر یاری تۆپی پێ‌، بەڵكو كاریگەری نەرێنی دەكاتە سەر تەواوی یاریە وەرزشیەكانی دیكە كە دەبێت بە هەمان شێوە گرنگیان پێ بدرێت.
 ڕاهێنەری هەڵبژاردەی ئەڵمانیا گوتیشی، بۆ ئەم بیرۆكەیە دەبێت پێش هەموو كەسێك بۆچوونی یاریزانان وەربگیرێت، لەبەرئەوەی ئەم بابەتە پەیوەندی ڕاستەوخۆی بە یاریزانان هەیەو پێویستە بۆچوون و تەندروستی ئەوان بە بایەخەوە لەبەرچاوبگیرێت، جێگای باسە لە چەند مانگی ڕابردوودا، تیمێكی ڕاوێژكاری وەرزشی سەر بە فیفا بە سەرۆكایەتی ڕاهێنەری ناسراوی فەڕەنسی ئارسن ڤینیگەر پێشنیازی ئەنجامدانی یاریەكانی مۆندیالی بۆ هەردوو ساڵ جارێك خستەڕوو.
ئەم پێشنیازەش لە لایەن یەكێتیەكانی تۆپی پێی ئەوروپاو ئەمەریكای باشوورو چەندین كەسایەتی وەرزشی وڵاتانی جیهان ڕەتكرایەوە، چەند یەكێتیەكی تۆپی پێی وڵاتانیش هەڕەشەی كشانەوەیان لە مۆندیال كرد ئەگەر هاتوو پێشنیازەكە جێبەجێ‌ كرا .