- پارتی لە ژمارەیەك دەڤەری عێراق كاندیدی بۆ ھەڵبژاردن دیاری كردوون و نوێنەری بارەگای بارزانیش دەڵێ: ئەوەی لە فەلووجە بینیمان، جێگەی ئومێدە، كە بەو شێوەیە خەڵكی پێشوازی لە كاندیدی پارتی بكات. راشیگه‌یاند:پێشبینی دەكەین دوو كورسی لە فەلووجە و كەربەلا بەدەست بێنین.
فارس عیسا، نوێنەری بارەگای بارزانی بۆ ھەڵبژاردن، بە ماڵپەڕی فەرمی پارتی دیموكراتی كوردستانی راگەیاند: لەسەر راسپاردەی بارەگای بارزانی، ئێمە وەك شاندێكی پارتی سەردانی شارۆچكەی فەلووجەمان كرد و لەلایەن خەڵكی فەلووجەوە لە شێخ و خەڵكی دیاری ناوچەكە پێشوازییەكی گەرم لە شاندی پارتی دیموكراتی كوردستان كرا، زۆربەی چین و توێژەكان لە بانگەشەی پارتی ئامادە بوون لە فەلووجە، خەڵكی فەلووجە رێز لە ھەڵوێستی پارتی و سەرۆك بارزانی دەگرن، لە كاتێكدا ھەموو دەرگاكان لەسەریان داخرابوون، پارتی و بارزانی دەرگایان لە خەڵكی ئەو دەڤەرە كردەوە، بە تایبەتی لە سەردەمی ھێرشی تیرۆریستانی داعش.
نوێنەرەكەی بارەگای بارزانی دەشڵێت: لەسەر بنەمای دەستوور، پارتی بەرنامەی ھەیە بۆ ئایندە و وەك پڕۆژەیەكی نیشتیمانی كاری لەسەر دەكات، پارتی لە ھەموو ناوچەكانی عێراق كاندیدی ھەیە لە واست و بەغدا و كەربەلا و ئەنبار و دیالە و سەڵاحەدین و لە ھەموو ناوچەكانی عێراق لە ھەڵبژاردندا بەشدارین.
ئاماژەی بۆ ئەوەش كرد: ئەگەر ساختەكاری نەكرێت لە ھەڵبژاردنی ئەمجارە و ئەوەی ئێمە بینویمانە و كاری بۆ دەكەین، كاندیدانی پارتی لە فەلووجە و كەربەلاش سەردەكەون، چونكە ئێمە ئەزموونمان ھەیە لە ھەڵبژاردن و جاری پێشووش كاندیدی پارتی لە بەغدا سەركەوت.
کۆمێنت (0)
تا ئێستا هیچ کۆمێنتێک نەکراوە.