سەرۆکی ئەمریکا، جۆ بایدن رایگەیاند کە ژمارەی ئەو سەربازانەی کە بۆ گواستنەوەی ستافی باڵیۆزخانەی وڵاتەکەی لە کابوڵ رەوانەی ئەفغانستان-ی دەکات بۆ پێنج ھەزار کەس زیادکردووە و لە ئەگەری ھەر ھێرشێکی تاڵیبانیش، ئەوا وەڵامێکی خێرا و بەھێزیان دەبێت.
جۆ بایدن لەبارەی پێشڕەوی خێرای تاڵیبان لە ئەفغانستان، راگەیەندراوێکی بڵاوکردەوە.
سەرۆکی ئەمریکا رایگەیاند کە بەمەبەستی گواستنەوەی ستافی باڵیۆزخانەی وڵاتەکەی لە کابوڵ و ئەو ھاووڵاتییە ئەفغانییانەی کە ھاوکاری ئەمریکا بوون، پێنج ھەزار سەرباز رەوانەی ئەفغانستان دەکات.
بایدن ئەوەشی خستەڕوو کە ئامانجیان ئەوەیە بە شێوەیەکی خێرا و سەلامەت ستافەکانیان لەو وڵاتە بگوازنەوە.
سەرۆکی ئەمریکا، جۆ بایدن لەبارەی ئەگەری ھێرشی چەکدارانی تاڵیبان بۆسەر ھێزەکانی ئەمریکا گوتی: "بە نوێنەرانی تاڵیبانمان لە دۆحە راگەیاندووە کە لە ئەگەری نانی ھەر ھەنگاوێک کە ئەرک و سەربازەکانمان لە ئەفغانستان بخاتە مەترسییەوە ئەوا وەڵامی سەربازیی خێرا و توند دەدرێتەوە".
پێشتر وەزارەتی بەرگریی ئەمریکا رایگەیاندبوو کە سێ ھەزار سەرباز بۆ گواستنەوەی ستافی باڵیۆزخانەی وڵاتەکەیان لە کابوڵ رەوانەی ئەفغانستان دەکەن.
کۆمێنت (0)
تا ئێستا هیچ کۆمێنتێک نەکراوە.