ژمارەی قوربانیانی ئەو تەقینەوەیەی کە لە بازاڕێکی میللی شاری سەدر رۆژهەڵاتی بەغدا پایتەختی عێراق روویدا بۆ 35 کوژراو و 60 بریندار بەرزبوویەوە.
سەرچاوەیەک لە فەرمانگەی تەندروستیی بەغدا راگەیاند، ژمارەی ئەو کەسانەی کە لە ئاکامی تەقینەوەی بۆمبێکی چێنراو لەناو بازاڕی میللی وەحیلات لە شاری سەدر رۆژهەڵاتی بەغدا بوونە قوربانی بۆ 35 کوژراو و 60 بریندار بەرزبوویەوە.
سەرچاوەکە کە نەیویست ناوی ئاشکرا بکرێت راشیگەیاند، بەهۆی بەهێزی تەقینەوەکە، پێشبینی بەرزبوونەوەی زیاتری ژمارەی قوربانییەکان دەکرێت چونکە هێشتا هەڵمەتی گەڕان بەدوای قوربانییەکان بەردەوامە و برینی ژمارەیەک لە بریندارەکانیش سەختە.
پێشتر سەرچاوەیەک لە فەرمانگەی تەندروستیی بەغدا راگەیاندبوو، لە ئاکامی تەقینەوەی بۆمبێکی چێنراو لەناو بازاڕی میللی وەحیلات لە شاری سەدر رۆژهەڵاتی بەغدا، 22 کەس کوژراون و 47 ی دیکە برینداربوون.
تاوەکو ئێستا هیچ لایەنێک بەرپرسیارییەتی خۆی لە ئەنجامدانی ئەو تەقینەوەیە رانەگەیاندووە.
کۆمێنت (0)
تا ئێستا هیچ کۆمێنتێک نەکراوە.