بێگه‌رد تاڵه‌بانی وه‌زیری كشتوكاڵ و سه‌رچاوه‌كانی ئاوی حكوومه‌تی هه‌رێمی كوردستان، له‌هه‌ژماری تایبه‌ت به‌خۆی له‌تۆڕی كۆمه‌ڵایه‌تى فه‌یس بووك بڵاویكرده‌وه: ئه‌مڕۆ یه‌كشه‌مه 11 ى 7 ى 2021 ، بەئامادەبوونی بریکار و ستافێکی وەزارەت ، پێشوازیمان کرد لە هەریەک لە باڵیۆز و کۆنسولی گشتی کۆماری پۆڵەندا لە هەرێمی کوردستان و عێراق.
بێگه‌رد تاڵه‌بانی رایده‌گه‌ێنێت: لەم دیدارەدا بەووردی گفتوگۆمان کرد دەربارەی چەندین تەوەری گرنگ بە ئامانجی پەرەپێدانی پەیوەندیەکانی نێوان هەردوولامان، بەتایبەتی لەبوارەکانی پەرەپێدانی پیشەسازی کشتوکاڵی و ئاڵوگۆڕی ئابوری و بازرگانی و سوود وەرگرتن لە ئەزموونی زانستی و ئەکادیمی و رەخساندنی دەرفەتی کار و راهێنانی فەرمانبەران و جوتیاران و گەشەپێدانی پرۆژەکانی گاوداری و کەرتی دەواجن و دامەزراندنی کارگەی بەرهەم هێنانی شیرەمەنی و دابین کردنی ئاسایشی خۆراک و دۆزینەوەی بازاڕ و ساغکردنەوەی بەرهەمەکانی جوتیاران و هەناردەکردن بەکوالێتی زۆر بەرز بۆ دەرەوەی ووڵات.
وه‌زیری كشتوكاڵ و سه‌رچاوه‌كانی ئاوی حكومه‌تی هه‌رێمی كوردستان ئاماژه بۆ ئه‌وه‌شده‌كات، لەرێگەی تیمێکی هونەری وەزارەتمان ئامادەکاری دەکرێت بۆ ئەنجامدانی یاداشتێکی لێک تێگەیشتن لە نێوان وەزارەتی کشتوکاڵ و سەرچاوەکانی ئاو و وڵاتی پۆلەندا.
راشیده‌گه‌ێنێت: لەلایەن خۆیانەوە شاندی میوان بانگهێشتی وەزارەتی کشتوکاڵ و سەرچاوەکانی ئاویان کرد بۆ بەشداریکردن لە پێشانگای نێودەوڵەتی ساڵانەی پۆڵۆنیا کە لەچەند مانگی داهاتوو بڕیارە ئەنجام بدرێت بۆمەبەستی سوود وەرگرتن و گواستنەوەی ئەزموون و پێشکەوتنی ئاستی بەرهەمهێنانی کشتوکاڵی و ئاودێری.
له كۆتاییدا وه‌زیری كشتوكاڵ و سه‌رچاوه‌كانی ئاو رایده‌گه‌ێنێت: زۆر سوپاسی ئەو پاڵپشتیەی ووڵاتی پۆلەندا دەکەین و بەڵێنی هەموو جۆرە ئاسانکاریەکمان پێدان بۆ ئەوەی کۆمپانیاکانی وڵاتی پۆڵەندا بتوانن سەرمایەگوزاری ئەنجام بدەن لە هەرێمی کوردستان لەپێناو پێشخستن و پەرەپێدانی بوژانەوەی کەرتی کشتوکاڵ وەک بنەمایەکی بەهێزی ئابووری.
شوان عه‌زیز
کۆمێنت (0)
تا ئێستا هیچ کۆمێنتێک نەکراوە.