پڕۆسەی تیروپشکی پێدانی ژمارە بە کاندیدانی ھەڵبژاردنەکانی پێشوەختە، لەلایەن کۆمسیۆنی باڵای سەربەخۆی ھەڵبژاردنەکانەوە دەستی پێ کرد.
میدیاکانی عێراق بڵاویانکردەوە کە ئەمڕۆ چوارشەممە، پڕۆسەی تیروپشکی پێدانی ژمارە بە کاندیدانی ھەڵبژاردنەکانی پێشوەختە لە نووسینگەکانی ھەڵبژاردن لە کەرخ و رەسافە لە بەغدا دەستی پێ کردووە.
ئاماژەیان بەوەیشداوە کە پڕۆسەی تیروپشکەکە لە نووسینگەکانی کەرخ و رەسافە تایبەتە بە پێدانی ژمارە بە کاندیدانی پێکھاتەکانی مەسیحی، کوردانی فەیلی، سابیئەی مەندائی، ئێزدی و شەبەک.
رۆژی دووشەممەی رابردوو، کۆمیسیۆنی باڵای سەربەخۆی ھەڵبژاردنەکان رایگەیاندبوو کە حەوتی ئەم مانگە، پڕۆسەی تیروپشکی پێدانی ژمارە بە کاندیدانی ھەڵبژاردنەکانی پێشوەختە، ئەنجام دەدرێت.
دوێنێ سێشەممە کۆمیسیۆنی باڵای سەربەخۆی ھەڵبژاردنەکان ئاشکرایکردبوو کە سێ ھەزار و 243 کاندید بۆ ھەڵبژاردنەکانی پێشوەختە پەسەندکراون کە بەسەر 83 بازنەی هەڵبژاردندا دابەشکراون.
چاوەڕوان دەکرێت ھەڵبژاردنەکانی پێشوەختە لە عێراق لە 10ی مانگی تشرینی یەکەمی ئەمساڵ ئەنجام بدرێت کە تیایدا 25 ملیۆن و 490 ھەزار و 341 دەنگدەر مافی بەشدارییکردنیان لە پڕۆسەکەدا ھەیە.
کۆمێنت (0)
تا ئێستا هیچ کۆمێنتێک نەکراوە.