په‌نابه‌رێکی دیکه‌ی کورد به‌ رووداوی هاتووچۆ له‌ یۆنان گیانی له‌ده‌ستدا

پەنابه‌رێكی مەریوانی  کە نزیکەی دوو هه‌فته‌ پێش ئێستا لە وڵاتی یۆنان لە ڕووداوێکی هاتووچۆدا بریندار ببوو، بەهۆی سەختی برینەکانیەوە گیانی لە دەست دا.

 رێكخراوی هه‌نگاو بۆ مافه‌كانی مرۆڤ بڵاوی كرده‌وه‌: رۆژی چوارشه‌مه‌ 23 -6- 2021 ،  پەنابه‌رێكی  خەڵکی مەریوان بە ناوی “ڕامین شەریفت” کە 18 ڕۆژ پێش ئێستا لە ڕووداوێکی هاتووچۆدا لە وڵاتی یۆنان بە سەختی بریندار ببوو، لە یەکێک لە نەخۆشخانەکانی ئەو وڵاتە گیانی لە دەست دا.

ڕامین شەریفی کاتژمیر 6ی بەیانی ڕۆژی شەممە 15ی جۆزەردان 2721 ، بە هۆی وەرگەڕانی ئۆتۆمبێلێکی هەڵگری پەنابه‌ران لە شاری “کاوالا”ی وڵاتی یۆنان لە گەڵ پەناخوازێکی دیکەی خەڵکی مەریوان بە ناوی لوقمان ئەحمەدی بریندار ببوون.

جێگای ئاماژەیە کە لەو ڕووداوەدا دوو پەنابه‌ری دیکەی خەڵکی مەریوان بە ناوەکانی  “موحسین ئەحمەدی” و “ڕزگار قوربانی” دەستبەجێ گیانیان لە دەست دا. 
تەرمی ئەو دوو کەسە چەند ڕۆژ پێش ئێستا گەڕێندرایەوە بۆ زێدەکەی خۆیان کە حکوومەتی ئێران لە بری گەڕاندنەوەی هەر تەرمێک 500 میلیۆن تمەنی لە بنەماڵەکانیان وەرگرتووە.

هەنگاو پێشتر لە زاری یەکێک لە پەناخوازەکانەوە ڕایگەیاندبوو کە، پۆلیسی یۆنان شوێنی ئۆتۆمبێلی هەڵگری ئەو پەنابەرانە کەوتووە و ئۆتۆمبێلەکەش بە هۆی خێرایی زۆرەوە وەرگەڕاوە.