فەرماندەیی هێزەکانی بۆشایی ئاسمانی ئەمریکا رایگەیاند کە چاوەڕوان دەکرێت مووشەکە لەکۆنترۆڵ دەرچووەکەی چین کۆتایی هەفتە بکەوێتە خوارەوە بۆسەر زەوی و بەردەوامیش دەبن لە چاودێریکردنی رێڕەوی ئەو مووشەکە.
لە کۆنترۆڵ دەرچوونی مووشەکی جۆری Long March 5Bی چین، جیهانی خستووەتە ئاگادارییەوە.
گوتەبێژ لە وەزارەتی بەرگریی ئەمریکا (پنتاگۆن)، مایک هۆوارد باسی لەوە کرد کە چاوەڕوانن مووشەکەکە لە هەشتی ئایاردا بکەوێتە سەر زەوی و رێڕەوەکەشی لەلایەن هێزەکانی بۆشایی ئاسمانی ئەمریکاوە چاودێری دەکرێت.
لە کاتێکدا مایک هۆوارد باسی لەوە کرد کە لەئێستادا نازانرێت پاشماوەکانی مووشەکەکە لە چ شوێنێکی جیهان دەکەوێتە خوارەوە، ئەوەشی خستەڕوو کە پێشبینی دەکەن هاتنەخوارەوەی مووشەکەکە بۆ زەوی چەند کاتژمێرێکی مابێت.
هەفتەی رابردوو، چین بەمەبەستی رەوانەکردنی پارچەکانی وێستگەی ئاسمانییەکەی ئەو مووشەکەی رەوانەی ئاسمان کرد.
پاش ئەوەی مووشەکەکە لە کۆنترۆڵ دەرچوو، بەشێکی پارچەکانی لە بەرگەهەوادا سووتا و نیگەرانیی هەیە لە کەوتنەخوارەوەی هەندێک لە پارچەکانی مووشەکەکە کە کێشەکەی 22 تۆنە بۆسەر زەوی.
کۆمێنت (0)
تا ئێستا هیچ کۆمێنتێک نەکراوە.