بۆ كۆچی دوایی حاجی عەبدوڵڕەحمان زینوەیی، سەرۆك بارزانی په‌یامێكی بڵاوكرده‌وه رایگه‌یاند: كۆچكردوو ڕۆڵی باڵای لە یارمەتیدانی شۆڕش لە گشت قۆناغەكاندا هەبووە و هەمیشە كەسێكی خۆشەویستی ناو جەماوەر و سەركردایەتیی شۆڕش بووە.
ئه‌مه ده‌قه‌كه‌یه‌تی:
بەناوی خودای بەخشندە و میهرەبان
بە داخێكی زۆرەوە هەواڵی كۆچی دوایی كەسایەتیی نیشتیمانپەروەر و پێشمەرگەی ماندوونەناسی هەردوو شۆڕشی ئەیلوول و گوڵان و هەڵگری میدالیای بارزانیی نەمر(حاجی عەبدوڵڕەحمان زینوەیی)ـم پێ گەییشت. حاجی عەبدوڵڕەحمان لە بنەماڵەیەكی قارەمان و كوردپەروەر و كەسێكی نزیكی جەنابی بارزانیی نەمر بوو و لە دەڤەری باڵەكایەتی خزمەتی زۆری شۆڕش و پارتی كردووە و ڕۆڵی باڵای لە یارمەتیدانی شۆڕش لە گشت قۆناغەكاندا هەبووە و هەمیشە كەسێكی خۆشەویستی ناو جەماوەر و سەركردایەتیی شۆڕش بووە.
سەرەخۆشی لە خۆمان و بنەماڵەی تێكۆشەری خوالێخۆشبوو حاجی عەبدوڵڕەحمان زینوەیی و كەسوكار و ئاشنایان و جەماوەری خۆشەویستی باڵەكایەتی و كوردستان دەكەم و خۆم بە هاوبەشی خەمیان دەزانم.
لە خودای مەزن داواكارم ڕۆحی خوالێخۆشبوو بە بەهەشتی بەرین شاد بكات و سەبر و ئارامی بە هەموو لایەك ببەخشێت.
انا للە و انا الیە ڕاجعون
مسعود بارزانی
10ـی نیسانی 2021
کۆمێنت (0)
تا ئێستا هیچ کۆمێنتێک نەکراوە.