كاتژمێر10:30 ى ئه‌مشه‌و به‌كاتی هه‌ولێر، یاری كۆتایی دواخراوی وه‌رزی ڕابردووی جامی شای ئیسپانیا له نێوان هه‌ردوو یانه‌ی ئه‌تله‌تیك بلباو و ڕیال سۆسیداد له یاریگای لاكارتوخا له شاری سیڤیلیه به‌ڕێوه‌ده‌چێت.
ئه‌م یارییه پارساڵ به‌هۆی بڵاوبوونه‌وه‌ی ڤایرۆسی كۆرۆنا دواخرابوو، پێشتریش یه‌كێتی تۆپی پێی ئیسپانیا بڕیاریدابوو ڕێژه‌یه‌كی دیاریكراوی هانده‌ران له یاریه‌كه ئاماده‌بن، به‌ڵام دوای هه‌ڵسه‌نگاندنی بارودۆخی ته‌ندروستی ئه‌و وڵاته‌و بۆ ڕێگریكردن له بڵاوبوونه‌وه‌ی زێتری ڤایرۆسی كۆرۆنا، بڕیاردرا ڕووبه‌ڕوو بوونه‌وه‌كه به‌بێ ئاماده‌بوونی هانده‌ران به‌ڕێوه‌بچێت.
ئه‌تله‌تیك بلباو له مێژووی خۆیدا بیستوسێ جار نازناوی جامی شای ئیسپانیای به‌ده‌ستهێناوه‌و له‌م وه‌رزه‌ش به هه‌مان شێوه گه‌یشتۆته یاری كۆتایی پاڵه‌وانێتیه‌كه‌و له حه‌ڤده‌ی ئه‌م مانگه ڕووبه‌ڕووی بارسێلۆنا ده‌بێته‌وه، سۆسیدادیش له مێژووی خۆی دوو جار به نازناوی كۆپا دێل ڕێ بردۆته‌وه.
کۆمێنت (0)
تا ئێستا هیچ کۆمێنتێک نەکراوە.