وه‌زاره‌تی كاروباری شه‌ھیدان و ئه‌نفالكراوانی حكومه‌تی هه‌رێم رایگه‌یاند: ئه‌مساڵ به‌هۆی ڤایرۆسی كۆرۆناوه، له‌چوارچێوه‌یه‌كی دیاریكراودا یادی كیمیابارانكردنی هه‌ڵه‌بجه ده‌كه‌نه‌وه.
له‌راگه‌یه‌ندراوێكدا، وه‌زاره‌تی شه‌هیدان و كاروباری ئه‌نفالكراوانی حكومه‌تی هه‌رێمی كوردستان، بۆ یادی سی و سێ ساڵه‌ی كیمیابارانكردنی هه‌ڵه‌بجه رایگه‌یاند: ڕژێمی به‌عس به كیمیابارانكردنی هه‌ڵه‌بجه و ده‌وروبه‌ره‌كه‌ی، ویستی ئه‌م مه‌ڵبه‌ندی شارستانیه‌ت و شیعر و ئه‌ده‌ب و كوردایه‌تیه له مێژووه پڕله سه‌روه‌ری و پڕشنگداره‌كه‌ی داببڕێت، به‌ڵام ئه‌و ڕژێمه داگیركار و سته‌مكاره نه‌ك له‌و ھه‌وڵه نه‌زۆكه‌یدا سه‌ركه‌وتوو نه‌بوو، به‌ڵكو كیمیابارانكردنی ھه‌ڵه‌بجه و ئه‌نفالی بارزان و گه‌رمیان و قه‌ره‌داغ و ناوچه‌كانی تری كوردستان له پاش چه‌ند ساڵێكی كه‌م، بوونه ھه‌وێنی به‌رخۆدان و تێكۆشان، ڕۆحی به‌رخودانی ھێنده به‌رزكرده‌وه كه ھاووڵاتیانی ئه‌م شاره قاره‌مانه ھاوشانی شاره‌كانی تری كوردستان دژ به‌و زوڵم و سته‌مه‌ی به‌عس ڕاپه‌رینێكی سه‌رتاسه‌ریان ئه‌نجامدا.
ئه‌وه‌شی خسته‌ڕوو، داوا له كۆمه‌ڵگه‌ی نێوده‌وڵه‌تی ده‌كه‌ن، ئه‌م تاوانه له سه‌ر ئاستی جیھانیی به جینۆساید بناسێنێت و له ھه‌مانكاتدا داوا له حكومه‌تی عێراقی فیدڕاڵیش ده‌كه‌ن، ھه‌ر چی زووه قه‌ره‌بووی زیان لێكه‌وتوانی ده‌ستی ڕژێمی پێشوو بكاته‌وه و پابه‌ند بێت به مادده‌ی سه‌د و سی و دووی ده‌ستوری عێراق بۆ دابینكردنی ژیانێكی شایسته بۆ كه‌س و كاری سه‌ربه‌رزی شه‌ھیدان و به‌ركه‌وتوانی چه‌كی كیمیاوی و ھه‌موو زیان لیكه‌وتوانی سه‌رجه‌م ناوچه كاره‌ساتباره‌كانی كوردستان.
وه‌زاره‌تی شه‌هیدان و كاروباری ئه‌نفالكراوان ئاماژه‌ی به‌وه‌شكرد، بۆ به‌رز و پیرۆز ڕاگراتنی یادی شه‌ھیدانی كیمیاباران، ساڵانه ئه‌و یاده كاره‌ساتبارانه ده‌كرێته‌وه، به‌ڵام ئه‌مساڵ به ھۆی بڵاوبوونه‌وه‌ی په‌تای ڤایرۆسی كۆرۆنا و بۆ زیاتر پابه‌ندبوونمان به بڕیار و ڕاسپارده‌كانی لیژنه‌ی باڵا و داموده‌زگا ته‌ندروستیه‌كان، له چوارچێوه‌یه‌كی دیاریكراودا ئه‌م یادانه ده‌كه‌ینه‌وه.
کۆمێنت (0)
تا ئێستا هیچ کۆمێنتێک نەکراوە.