وەزیری ئاوەدانکردنەوە و نیشتەجێکردنی هەرێم رایگەیاند، لەهەوڵی ئەوەدان بودجە بۆ تەواوکردنی پرۆژە خزمەتگوزارییەکانی یەکەی نیشتەجێبوون تەرخانبکەن، بۆئەوەی ژمارەیەک یەکەی نیشتەجێبون بۆ کەمدەرامەتان تەواو بکرێت.
دانا عەبدولکەریم وەزیری ئاوەدانکردنەوە و نیشتەجێکردنی حکومەتی هەرێمی كوردستان رایگەیاند، ژمارەیەک یەکەی نیشتەجێبون لە ساڵانی رابردودا چونەتەوە بواری جێبەجێکردنەوە، بەڵام بەهۆی نەبونی بودجەی پێویستەوە نزیکەی نۆهەزار یەکەی نیشتەجێبون کارکردن تێیاندا راوەستاوە.
دانا عەبدولکەریم وەزیری ئاوەدانکردنەوە و نیشتەجێکردنی حکومەتی هەرێمی كوردستان ده‌شڵێت: پلانمان داناوە لەمساڵدا دەستبکرێتەوە بە کارکردن لەو یەکە نیشتەجێبونانەی کە رێژەی جێبەجێکردنیان گەیشتۆتە لە (85٪) و دەبێت لەسەر بودجەی حکومەتی هەرێمی کوردستان تەواوبکرێن.
ئاماژەی بەوەشکرد، پلانێکیان پێشکەشی ئەنجومەنی وەزیران کردووە، بۆئەوەی ئەو پرۆژانەی بە تەواونەکراوی ماونەتەوە و رێژەی کارکردن تێیاندا نەگەیشتۆتە لە (85٪) حکومەت رەزامەندی لەسەر کارکردنیان بدات و تەواو بکرێن.
وەزیری ئاوەدانکردنەوە و نیشتەجێکردنی هەرێم راشیده‌گه‌ێنێت: ژمارەیەکی زۆر لەو پرۆژانە تەواوبوون، بەڵام تا ئێستا ئاو و کارەبا و چەند خزمەتگوزارییەکی دیکەیان ماوە بۆئەوەی هاوڵاتی بتوانێت تێاندا نیشتەجێببێت.
وتیشی: لەمساڵدا ژمارەیەک پرۆژەی یەکەی نیشتەجێبوون بۆ کەمدەرامەتان تەواودەکرێت.
کۆمێنت (0)
تا ئێستا هیچ کۆمێنتێک نەکراوە.