حه‌سه‌ن ته‌میمی، وه‌زیری ته‌ندروستیی و ژینگه‌ی عێراق، رایگه‌یاند كه ھه‌ر كه‌سێك سه‌رپێچی رێنماییه‌كانی خۆپارێزیی له ڤایرۆسی كۆرۆنای نوێ (COVID-19) بكات، ئه‌وا سزای توند ده‌درێت.
حه‌سه‌ن ته‌میمی له لێدوانێكی رۆژنامه‌وانییدا سه‌باره‌ت به پێشھاته‌كانی ره‌وشی ڤایرۆسی كۆرۆنا له عێراق گوتی: تیمه‌كانی ته‌ندروستیی له‌نێو شه‌قامه‌كانی به‌غدای پایته‌خت و سه‌رجه‌م پارێزگاكاندا بڵاوده‌كرێنه‌وه، بۆ ئه‌وه‌ی سزای ئه‌و كه‌سانه بده‌ن كه پابه‌ند نین به رێوشوێنه‌كانی خۆپارێزیی.
گوتیشی: ھێزه ئه‌منییه‌كان یاوه‌ری تیمه‌كانی ته‌ندورستیی ده‌كه‌ن بۆ ئه‌وه‌ی به باشترین شێوه، ئه‌ركه‌كانیان جێبه‌جێ بكه‌ن.
وه‌زیری ته‌ندروستیی و ژینگه‌ی عێراق، باسی له‌وه‌شكرد كه به‌پێی بڕیاره‌كانی لیژنه‌ی باڵای ته‌ندروستیی و سه‌لامه‌تی نیشتمانیی و یاسای ته‌ندروستیی گشتیی، ھه‌ر كه‌سێك سه‌رپێچی رێنماكانی خۆپارێزیی بكات، ئه‌وا سزای توند ده‌درێت.
به‌ھۆی زیادبوونی حاڵه‌ته‌كانی تووشبوون و گیانله‌ده‌ستدان به ڤایرۆسی كۆرۆنای نوێ، دوێنێ شه‌ممه لیژنه‌ی باڵای ته‌ندروستیی و سه‌لامه‌تی نیشتمانیی عێراق له چوارچێوه‌ی توندوتركردنی رێوشوێنه‌كانی خۆپارێزیی ژماره‌یه‌ك بڕیاری نوێی ده‌ركرد له‌وانه، بڕیاریدا به قه‌ده‌غه‌كردنی ھاتوچۆی شه‌وانه له سه‌رجه‌م پارێزگاكاندا.
کۆمێنت (0)
تا ئێستا هیچ کۆمێنتێک نەکراوە.