ڕۆژی یه‌كشه‌ممه 7ـی شوباتی 2021 له سه‌لاحه‌ددین سه‌رۆك مه‌سعود بارزانی پێشوازی له شێخ حومێد ده‌هام ئه‌لهادی شێخ و سه‌رۆكی هۆزی شه‌ممه‌ر له سووریا كرد.
له دیداره‌كه‌دا دوای ئاڵوگۆڕكردنی بیروڕا له‌مه‌ڕ بارودۆخ و دوا پێشهاته‌كانی سووریا هه‌ردوولا وێڕای ئاماژه‌دان به دۆستایه‌تی و په‌یوه‌ندیی دێرینه‌ی نێوانیان، جه‌ختیان له‌سه‌ر پته‌وتركردنی په‌یوه‌ندی و برایه‌تیی نێوان كورد و عه‌ره‌ب و نه‌ته‌وه‌كانی تر له سووریا و به تایبه‌ت له ناوچه‌ی جزیره كرده‌وه.
هه‌ر له‌و دیداره‌دا سه‌رۆك بارزانی به په‌رۆشه‌وه باسی له بارودۆخی ناله‌باری سووریا كرد و هیوای خواست كه چاره‌سه‌رێكی سیاسیی گشتگیر هه‌بێت بۆ ڕزگاربوونی پێكهاته‌كانی سووریا له‌و نه‌هامه‌تی و ته‌نگوچه‌ڵه‌مه چه‌ند ساڵه‌یه‌ی له‌ئارادایه. هه‌روه‌ها سه‌رۆك بارزانی پاراستنی ئاساییش و ئارامیی ناوچه‌كه و، به‌هێزكردنی بنه‌ماكانی پێكه‌وه‌ژیانیشی وه‌ك بنه‌مایه‌ك بۆ گه‌ڕانه‌وه‌ی ئارامی و ئاسووده‌یی بۆ خه‌ڵكی ناوچه‌كه به پێویست زانی.
کۆمێنت (0)
تا ئێستا هیچ کۆمێنتێک نەکراوە.