بەشیر حەداد: ئه‌نجوومه‌ن کار بۆ پەسەندکردنی یاساکانى لێپرسینەوە و چاکسازی بۆ رووبەڕووبونه‌وه‌ى گەندەڵی ده‌کات

 له‌ رۆژی جیهانی بەرنگاربوونەوەی گەندەڵیی، دکتۆر بەشیر خەلیل حەداد، جێگری سەرۆکی ئەنجومەنی نوێنەرانی عێراق داوای لە لیژنە پەرلەمانیەکانی ئەنجومەنی نوێنەران کرد، کاری زیاتر بکەن بۆ بەدواداچوون و رووبەڕووبوونەوەی گەندەڵی و بەهەدەردانی سامانی گشتی. 
جێگری سەرۆکی ئەنجومەنی نوێنەرانی عێراق رایگەیاند:” لە رۆژی جیهانی رووبەڕووبوونەوەی گەندەڵیدا داوا لە لیژنەکانی ئەنجومەنی نوێنەران و دەستەی دەستپاکی و دیوانی چاودێری دارایی فیدراڵی و داواکاری گشتی و ئەنجومەنی دادوەری دەکەین، کاری جدی بکەن بۆ بەدواداچوون و ئاشکراکردنی مەلەفی گەندەڵی کە بوونەتە هۆی قەیران و تێکدانی وڵات و لەناو بردنی ژێرخانی ئابووری.”
دکتۆر بەشیر حەداد ئاماژەشی بەوەدا کە ئەنجومەنی نوێنەرانی عێراق کار دەکات بۆ پەسەندکردنی یاساكانى لێپرسینەوە و چاکسازی بۆ رووبەڕووبەوەی گەندەڵی و بەهەدەردانی سامانی گشتی، ئەویش لە رێگەی پێکهێنانی لیژنەکانی لێکۆڵینەوە و لیژنە وردبینییەکان بۆ بەدواداچوونی کاروباری ئیداری و هونەری لە وەزارەتەکان و دامودەزگاکانی دیکەی دەوڵەت.    
حەداد راشیگەیاند:”هیوادارین هەموولایەکمان بە جدی کار بکەین بۆ گەڕانەوەی پێگەی ئەنجومەنی نوێنەران و گەڕانەوەی متمانە لە نێوان ئەنجومەنی نوێنەران و شەقام.”