له پێشبركێیه‌كدا له وڵاتی سوید به‌ناوی Ortens bästa penna كه بۆ ئه‌و نوسه‌ر و گه‌نجانه ڕێكده‌خرێت له ده‌ره‌وه‌ی شاره گه‌وره‌كان ده‌ژین و نوسه‌ری كتێب یان شانۆنامه‌ن، دوو گه‌نجی كورد به‌ناوی لۆران باتی و فیرده‌وس ئانیك خه‌ڵاتی باشترین نوسه‌ریان وه‌رگرت.
فیرده‌وس ئانیك خه‌ڵكی شاری ماردینه له باكوری كوردستان و ماوه‌ی ته‌نها سێ ساڵه له‌گه‌ڵ خێزانه‌كه‌ی گه‌شتی وڵاتی سویدیان كردووه.
له‌دوای وه‌رگرتنی خه‌ڵاته‌كه‌ی فیرده‌وس ڕۆژنامه‌نوسانی ڕاگه‌یاند، "شانۆنامه‌كه‌ی من له‌باره‌ی ئه‌و كه‌سانه‌وه‌یه كه ماوه‌یه‌كی ژیانیان له وڵاتی خۆیان ده‌بێت و دواتر گه‌شتی وڵاتێكی دیكه ده‌كه‌ن، كه ئه‌مه ده‌بێته هۆی چه‌ند گرفتێك له‌وانه پێكدادانی كه‌لتوری و گۆڕینی شێوازی ژیان".
هاوكات لۆران باتی كه گه‌نجێكی كورده و به‌هه‌مان شێوه له ئویسالا ده‌ژی و شوێنێكی بچوكتره له شاره‌كانی دیكه‌ی سوید ده‌ڵێت، "تۆ ئه‌گه‌ر خه‌ڵكی ئه‌م وڵاته نه‌بیت، هه‌رشتێك له‌باره‌ی خۆت و ژیانه‌وه بنوسیت ده‌بێت ئه‌وه ره‌نگبداته‌وه كه شێوازی ژیان لێره و له زێدی خۆت چه‌ند جیاوازه".
ژێده‌ر: ئێستا
کۆمێنت (0)
تا ئێستا هیچ کۆمێنتێک نەکراوە.