پشتى كۆمبونا رۆژا ٢٠٢٠/٢/٢٢ێ ل هه‌ولێرا پایته‌خت كو ل ژێر سه‌رپه‌رشتى یا وه‌زیرێ نافخو دگه‌ل وه‌زاره‌ت و دام و ده‌زگه‌هێن په‌یوه‌ندیدار و ده‌روازه‌یێن سنورى ژپێخه‌مه‌ت رێگیرى كرن ژ هاتنا ڤایروسا (كورونا)یێ هاتیه ئه‌نجامدان.
ئه‌ڤرو روژا دووشه‌مبى ل رێكه‌فتى ٢٠٢٠/٢/٢٤ێ لسه‌ر داخوازا "حه‌مید عه‌لى" سه‌رپه‌رشتێ كومه‌لگه‌ها ده‌روازه‌یێ نیڤ ده‌وله‌تى ئیبراهیم خه‌لیل، ب مه‌به‌ستا هه‌ماهه‌نگى و تۆندوتول كرنا سنوران ژپێخه‌مه‌ت كۆنترول كرنا ھاتنا ڤایروسا (كورونا)یێ، كومبونه‌ك ل كۆمه‌ڵگه‌ها سنورێ نیڤده‌وله‌یتێ ئیبراهیم خه‌لیل هاته ساز دان.
ئه‌و لایه‌نێن كو به‌رهه‌ڤێن كۆمبونێ بوین پێك هاتبون ژ سه‌رپه‌رشتێ كۆمه‌ڵگه‌ها ده‌روازه‌یێ نیڤ ده‌وله‌تى ئیبراهیم خه‌لیل "حه‌مید عه‌لى"، شانده‌كێ رێڤه‌به‌رییا گشتى یا ساخله‌میا دهوكێ ب سه‌رۆكایه‌تییا رێڤەبەرێ گشتیێ ساخلەمی یا دھوکێ دكتور "نزار عصمت"، نوێنه‌رێ پارێزگارێ دهوكێ "خێرهاد عابد"، سه‌رپه‌رشتێ ده‌روازه‌یێ پیشابوورێ "شه‌وكه‌ت به‌ربوهارى"، سه‌په‌رشتێ ده‌روازه‌یێ سه‌رزێرێ "عرفان سلێمان" و هه‌روه‌سا به‌رپرسێن فه‌رمانگه‌هێن لایه‌نێن په‌یوه‌ندارژى ل كۆمبونێ دبه‌رهه‌ڤ بون.
دكومبونێدا ته‌كه‌ز لسه‌ر چاوانییا كۆنترولكرنا ده‌روازه‌یان هاته كرن و چه‌ند خالێن سه‌ره‌كى هاتنه به‌حس كرن ژوانان :
هه‌ر ولاتیه‌كێ كو خودانى ناسنامه‌یا عیراقى بیت و ل ٢٠٢٠/١/١٤ێ سه‌ردانا ولاتێ چینێ كربیت یان ژى ل پشتى ٢٠٢٠/٢/٥ێ سه‌ردانا ولاتێ ئیرانێ كربیت، دێ ژلایێ تیما ساخله‌میا سه‌ر سنورى ب شێوازه‌كێ زانستى هێته ره‌وانه‌كرن بۆ جهێ پێدڤى ل نه‌خوشخانه‌یا ته‌نگاڤیان، ئه‌گه‌ر هیمایێن هه‌لگرتنا ڤایروسا كورونایێ ل وى-وێ كه‌سى دیار بون، دێ كه‌ڤیته دبن چاڤدێریێ ڤه دژووره‌كا تایبه‌تدا، ئه‌گه‌ر چ هیمایێن هه‌لگرتنا ڤایروسێ لێ دیار نه‌بون، دێ هێته ره‌وانه كرن بۆ موتێله‌كا تایبه‌ت كو ل زاخو بۆ ڤان حاله‌تان هاتیه دابین كرن و كه‌ڤیته دبن چاڤدێرییا ساخله‌میێ ڤه هه‌تاكو 14 رۆژ لسه‌ر ده‌مێ سه‌ردانا وى-وێ بۆ وان هه‌ردوو ولاتان ده‌رباز دبیت، ب مه‌به‌ستا پشت راست بوون ژوێ چه‌ندێ كو ئه‌ڤ كه‌سه دناڤ وان هه‌ردوو ولاتاندا ڕاستى ڤێ ڤایروسا ناڤبرى نه‌بوویه.
ستافه‌كێ ساخله‌میێ تایبه‌ت دگه‌ل ستافێن ساخله‌مى یێن ده‌روازه‌یان ب جل و به‌رگ و كه‌ل و په‌ل و ئامیره‌یێن پێدڤى 24 ده‌مژمێران دێ ل خالێن پشكنینێ رێكارێن ساخله‌میێ گرنه‌به‌ر.
هه‌مى ترومبلێن (بارى و تایبه‌ت) دێ ب ده‌رمانێن دژه ڤایروسان هێنه ره‌شاندن و پاقژ (تعقیم) كرن.
- ژبو هشیار كرنا تاكی ب مه‌به‌ستا خوه‌پاراستنا ساخله‌میێ ژ ڤێ ڤایروسا ناڤبرى بتایبه‌تى، دناڤ فه‌رمانگه‌هێن كۆمه‌ڵگه‌هێ و جهێن پێدڤى یێن سنورى دێ ب پوسته‌ر و فیلیكسان ب چار زمانێن (كوردى، عه‌ره‌بى، تورکی، ئنگلیزى) هێنه به‌لاڤ كرن و هه‌لاویستن.
ل داوییا كۆمبونێ سه‌رپه‌رشتێ كومه‌لگه‌ها ده‌روازه‌یێ نیڤ ده‌وله‌تى ئیبراهیم خه‌لیل "حه‌مید عه‌لى" به‌رهه‌ڤیا خوه دیار كر كو ئه‌وا دشیاندا هه‌بیت دێ پشته‌ڤان بن مینا ئه‌ركه‌كێ مرۆڤى و نیشتیمانى درێغیێ ناكه‌ن...
راگه‌هاندنا كومه‌لگه‌ها ده‌روازه‌یێ نیڤ ده‌وله‌تى ئیبراهیم خه‌لیل
کۆمێنت (0)
تا ئێستا هیچ کۆمێنتێک نەکراوە.