بەهێزکردنی بەرگری لەشی منداڵ زۆر گرنگە لە رێگای خۆراکی تەندروستەوە، بەشێوەیەکی گشتی ئاژەڵە ئاویەکان وەك ماسی چونکە برێکی زۆر ئۆمێگا۳ تێدایە کە زۆر پێویستە بۆ لەش و پێکهاتەی ترشە چەوریان تێدایە، دەبێتە هۆی چاڵاککردنی لەش و بەهێزکردنی بەرگری و بەرزکردنەوەی ئاستی زیرەکی مێشک.
برۆکلی یەکێکە لە باشترین جۆرەکانی سەوزەوات بۆ لەشی منداڵ و پێكهاتەی دژە ئۆکسان، ڤیتامین، کانزا و ماددەی ریشالی زۆری تێدایە، لە هەمان کاتدا دژی نەخۆشییەکانی شێرپەنجەی ڕیخۆلەیە و ئێسکەکان و بەرگری لەش بەهێزدەکات هەروەها بۆ منداڵانی تەمەن (٦_۱۲) ساڵ رۆژانە خوردنەوەی ۲ کوپ شیری کەم چەور پێویستە، چونکە سەرچاوەی دابینکردنی ڤیتامینD و کالیسیۆمە کە دەبێتە هۆی بەهێزکردنی ئێسك و ددانەکان و بەرگری لەش و باشی گەشەکردن.
سەرەرای ئەوەش دەبێت دایك و باوکان گرنگی بە شووشتنی ددانی منداڵەکانیان بدەن کە رۆژانە پێویستە ۲ جار ددانیان بشۆن، جارێك تەنها پێش کاتی نووستن وە بە لایەنی کەم جارەکەی تر لە ماوەی رۆژدا بێت. زۆر خواردنی شیرینی زیانی زۆری هەیە بۆ ددان و خواردنی چەرەزات سوودێکی زۆری هەیە بۆ ددانەکان.
وە دەبێت بەردەوام ساڵانە پشکنینی پزیشکی وەکو (پەستانی خوێن و شەکرە و پشکنینی چاو و ڤیتامین AوD) ئەنجامبدرێت، کە ساڵانە نزیکەی چارەکە ملیۆنێك منداڵ تووشی کوێری دەبن بەهۆی کەمی ڤیتامین A یەوە، ئەویش یەکێکە لە نیشانە و بەرئەنجامە تووندەکانی کەمی ئەو ڤیتامینە.
نووستن: جەستەی مرۆڤ بەگوێرەی تەمەنی پێویستی بەوە هەیە لە شەو ڕۆژێکدا چەند کاتژمێر بخەوێت، بۆیە کاتێک منداڵ دەچێتە خوێندنگە واتە لە تەمەنی ٦ بۆ ۱۳ ساڵیدا پێویستە لە شەو رۆژێکدا ۹ بۆ ۱۱ کاژێر بخەوێت. شێوازی خوتن زۆر گرینگە نووستن لەسەر سك (خوتن بە دەما) زیانێکی زۆری هەیە و دەبێتە هۆی بەد هەرسی، زیادبوونی کێش، زیانی گورچیلە و ئازار لە پشت و ئەژنۆدا دروست دەکات، بۆیە نووستن لەسەر لای راست سوودی زۆری بۆ لەشت هەیە، چونکە هەناسەدانت ئاسان دەکات، سییەکان چاڵاک دەکات و کرداری هەرس و کارەکانی جگەر خێرا دەکات. گونجاوترین کاتی خەوتن بۆ منداڵان کاژێر ۱٠ شەوە چونکە لەو کاتەدا هۆرمۆنی خەوتن (میلاتۆنین) لە مێشك دەردەدرێت.
پلەی ستەیشن یەکێکە لەو یاریە ئەلیکترۆنیانەی لەم رۆژگارەدا منداڵان و هەرزەکاران تووشی جۆرێك لە خووگیری کردووە کە رۆژانە چەندین کاژێر خەریکی ئەم یارییە ئەلیکترۆنیانەن کە بە داخەوە گوێ بە ڕەوشی دانیشتن و پاڵکەوتنیش نادەن کاتێك ئەم یارییانە دەکەن کە ئایا دانیشتنێکی تەندروستە یان نا، بە داخەوە زۆر جار کاریگەری خراپی دەبێت بۆ کۆئەندامەکانی لەش بە تایبەتی پشت و چاو، کات دیاری بکەن بۆ منداڵان و هەرزەکاران بۆ یاری کردن بە پلەی ستەیشن کە رۆژانە لە یەک کاژێر تێپەر نەکات.
أحمد شێروانی قوتابی کۆلێژی پزیشکی
کۆمێنت (0)
تا ئێستا هیچ کۆمێنتێک نەکراوە.