رێبه‌رانی گروپی " ده‌سته‌ی ته‌حریر شام " له سووریا، له به‌یاننامه‌یه‌كدا رایانگه‌یاندووه كه ئه‌وان ناڕازین له‌وه‌ی رووسیا و توركیا رێككه‌وتوون سه‌باره‌ت به درووستكردنی ناوچه‌یه‌كی سڤیل و چه‌ك داماڵین له هێزه‌كانی ئۆپۆزیسیۆنی ئه‌م ناوچه‌یه.
گروپی ته‌حریر شام كه له تێكه‌ڵبوونه‌وه‌ی چه‌ندین گروپی سه‌له‌فی و هه‌روه‌ها به‌ره‌ری فه‌تح شام (جه‌بهه النصره)ـی پێشوو پێكهاتووه و سه‌ره‌كیترین هاوپه‌یمانییه له پارێزگای ئدلب، رۆژی رابردوو له به‌یاننامه‌یه‌كدا ناڕه‌زایه‌تیی خۆیان له ر ێككه‌وتنه‌كه‌ی رووسیا و توركیا پیشاندا.
له به‌یاننامه‌كه‌یاندا باسیان له‌وه كردووه كه له‌گه‌ڵ توركیای هاوپه‌یمانی خۆیان هاوكاریی ده‌كه‌ن به ئاراسته‌ی پێشگیریی له ئه‌گه‌ری ده‌ستپێكردنی هێرشه‌كانی رژێمی به‌شار ئه‌سه‌د بۆسه‌ر ناوچه‌كه و رێگری له زیان گه‌یشتن به هاوڵاتییانی سڤیل،به‌ڵام له به‌رامبه‌ر ئه‌گه‌ری هێرشه‌كانی حكومه‌تی رووسیا و رژێمی به‌شار ئه‌سه‌د و حكومه‌تی ئێراندا، پێیان باشتره گرێنتییه‌ك بۆ پاراستنی خۆیان بهێڵنه‌وه، هه‌ر بۆیه قبوڵی ناكه‌ن چه‌كیان لێبسه‌نرێته‌وه.
هه‌روه‌ها له به‌یاننامه‌كه‌دا گروپی ته‌حریر شام به راشكاوانه وتوویانه: ئێمه چه‌ك دانانێین و خاكی خۆمان به‌جێناهێڵین و چاوپۆشیی له ئامانجی شۆڕشگێڕانه‌ی خۆمان ناكه‌ین.
شایه‌نی باسه كه ره‌جه‌ب ته‌یب ئه‌ردۆغان و ڤلادیمێر پۆتین سه‌رۆك كۆماری وڵاتانی توركیا و رووسیا رۆژی 17ـی ئه‌م مانگه له دانیشتنێكدا له شاری سوچیی رووسیا سه‌باره‌ت به چاره‌نووسی دوایین بنكه‌كانی ئۆپۆزیسیۆنی سووریا له پارێزگای ئدلب گه‌یشتنه رێككه‌وتن له‌سه‌ر ئه‌وه‌ی كه چه‌ك له‌و گروپانه داماڵرێت و ئه‌وێیان پێ چۆڵ بكه‌ن.
سه‌رچاوه / رادیۆ فه‌ڕه‌نسا
مه‌سعود / كوردستان تیڤی
کۆمێنت (0)
تا ئێستا هیچ کۆمێنتێک نەکراوە.