دكتۆر پشتیوان سادق، وه‌زیری په‌روه‌رده‌ی حكومه‌تی هه‌رێمی كوردستان روونكردنه‌وه‌یه‌ك ده‌رباره‌ی ئه‌و مامۆستایه‌ی كه له خۆپیشاندانی رۆژی 25/3/2018 له لایه‌ن چه‌ند كه‌سێكه‌وه لێیدرا ده‌ده‌ت و ده‌لێت: ئه‌و ڕووداوه له ناخه‌وه هه‌ژاندمی.
له په‌یامێكدا پشتیوان سادق ده‌ڵێت: ئه‌و ڕووداوه‌ی به‌رامبه‌ر مامۆستا به‌ڕێزه‌كه له هه‌ولێر ئه‌نجام درا، له ناخه‌وه هه‌ژاندمی و به هه‌موو شێوه‌یه‌ك پشتگیری ده‌كه‌م و خۆم به پارێزه‌ری به‌ڕێزیان ده‌زانم، و به هیچ جۆرێك له‌گه‌ڵ شكاندنی شكۆ و ڕێزی مامۆستادا نیم و پێویسته مامۆستا كه پێگه‌یێنه‌ری نه‌وه‌كانه، هه‌رده‌م ڕێزلێگیراو بێت.
ده‌شڵێت: به‌نده به شه‌خسی ئه‌م مامۆستایه ده‌زانم كێیه و له كام قوتابخانه خزمه‌ت ده‌كات، به‌ڵام له‌م بارودۆخه‌دا زۆر كه‌س بۆ هه‌ڵمه‌تی هه‌ڵبژاردن و سیاسه‌تكردن و فه‌وزای سیاسی له كوردستان نانی پێوه ده‌خوات، ده‌نا مافی ڕه‌وای مامۆستایان و ئه‌و مامۆستا به‌ڕێزه‌یه كه داوای شه‌رعی خۆیان هه‌بێت، كه‌چی به‌داخه‌وه تێكه‌ڵ به بابه‌تی دیكه ده‌كرێت، بۆیه ئه‌م مامۆستایه خۆی حه‌ز ناكات ده‌ركه‌وێت و خه‌ڵك بزانێت كێیه.
هه‌روه‌ها ده‌لێت: به‌ڕێزی ناڕاسته‌وخۆ په‌یامی بۆ ئێمه ناردووه كه "ئه‌م ڕه‌فتاره‌ی كه به‌رامبه‌رم كراوه، له‌سه‌ر هیچ ده‌زگا و لایه‌ن و كه‌سێك حیسابی ناكه‌م، به‌ڵكو خوازیارم یاسا سه‌روه‌ر بێت و گوزه‌رانی مامۆستا چاك بكرێت".
له په‌یامه‌كه‌یدا وه‌زیری په‌روه‌رده ده‌ڵێت: مامۆستایانی خۆشه‌ویست دڵنیا ده‌كه‌ینه‌وه كه ئێمه خزمه‌تكار و دڵسۆزیان ده‌بین و ئاینده زۆر گه‌شه، هه‌روه‌ها سوپاسی خۆراگری و دڵسۆزی مامۆستایان ده‌كات.
له‌باره‌ی ده‌زگاكانی ئاسایشه‌وه پشتیوان سادق ده‌ڵێت: ده‌زگاكانی پاراستنی ئارامی وڵات به گشتی به خوێن و ماندووبوونی خۆیان خزمه‌تێكی زۆریان كردووه، هه‌ر كه‌سێك كارێكی نه‌رێنی بكات، ئه‌وا نابێت له‌سه‌ر كۆی ده‌زگاكه حیساب بكرێت، به‌ڵكو ڕه‌نگدانه‌وه‌ی ڕه‌فتاری كه‌سییه نه‌وه‌ك ده‌زگاكه.
کۆمێنت (0)
تا ئێستا هیچ کۆمێنتێک نەکراوە.