وه‌زیری ناوخۆی هه‌رێمی كوردستان، به‌بۆنه‌ی رۆژی ئاڵای كوردستان رایگه‌یاند: ته‌نها دیالۆگ و گفتوگۆ تاكه چاره‌سه‌ره له نێوان هه‌ولێر و به‌غدا. مێژوو سه‌لماندوویه‌تی كه به هێزو شه‌ڕ هیچ كێشه‌یه‌ك چاره‌سه‌ر ناكرێت.
له سه‌رۆكایه‌تی ئه‌نجوومه‌نی وه‌زیران، به ئاماده‌بوونی كه‌ریم شنگالی، وه‌زیری ناوخۆی حكوومه‌تی هه‌رێمی كوردستان له‌بری سه‌رۆكوه‌زیرانی هه‌رێم، ئه‌م یاده به‌رز راگیرا و به‌ده‌م سروودی نیشتمانییه‌وه له لایه‌ن بنه‌ماڵه‌ی شه‌هیدێكه‌وه ئاڵای كوردستان له باڵه‌خانه‌ی ئه‌نجوومه‌نی وه‌زیرانی هه‌رێم به‌رزكرایه‌وه و پاشان وه‌زیری ناوخۆ، كه‌ریم شنگالی به‌ناوی سه‌رۆكایه‌تی ئه‌نجوومه‌نی وه‌زیرانه‌وه گوتارێكی خوێنده‌وه.
له مه‌راسیمه‌كه‌دا كه‌ریم شنگالی، هیوای ئه‌وه‌ی خواست كه رۆژی ئاڵای كوردستان هه‌مووان كۆبكاته‌وه تاوه‌كو به یه‌كگرتوویی به‌رامبه‌ر هه‌ڕه‌شه و مه‌ترسییه‌كان بوه‌ستنه‌وه و رووبه‌ڕووی قه‌یرانه‌كان ببینه‌وه
هه‌روه‌ها گوتی: له‌م ده‌رفه‌ته‌دا دووپاتی ده‌كه‌ینه‌وه كه ته‌نها دیالۆگ و گفتوگۆ تاكه چاره‌سه‌ره له نێوان هه‌ولێر و به‌غدا. مێژوو سه‌لماندوویه‌تی به هێزو شه‌ڕ هیچ كێشه‌یه‌ك چاره‌سه‌ر ناكرێت، به‌ڵكو كێشه‌كان قووڵتر ده‌كاته‌وه و ده‌بێته مایه‌ی زیان و نه‌هامه‌تیی زیاتر. ئێمه گه‌لێكی ئاشتیخوازین و ده‌ستی ئاشتی بۆ گه‌لانی عێراق درێژ ده‌كه‌ین، ئاماده‌ین به ئاشتی و دیالۆگ و گفتوگۆ و دوور له زمانی هێز و خۆسه‌پاندن.
ئاماده‌كردنی : رزگار
کۆمێنت (0)
تا ئێستا هیچ کۆمێنتێک نەکراوە.