مەکتەبی سیاسیی پارتی دیموکراتی کوردستان، بۆ کۆچی دواییی کەسایەتیی دیار و ناسراو، خوالێخۆشبوو عەبدولواحید بارزانی، پرسەنامەیەکی هاوخەمی و سەرەخۆشیی ئاراستەی سەرۆک بارزانی کرد.
دەقی پرسەنامەکەی مەکتەبی سیاسیی بۆ سەرۆک بارزانی:
بەڕێز جەنابی سەرۆک بارزانی
دڵتەنگ و خەمباربووین بە بیستنی هەواڵی کۆچی دوایی کەسایەتیی دیار و ناسراو، خوالێخۆشبوو (عەبدولواحید ئیبراهیم شێخ عەبدولسەلام بارزانی). بە دڵێکی پڕ لە خەمەوە، هاوسۆزی و هاوخەمیی خۆمان و هەڤاڵانی کۆمیتەی ناوەندی و پارتیمان ئاراستەی جەنابتان و بنەماڵەی سەربەرز و تێکۆشەری بارزانی و سەرجەم دڵسۆزانی نیشتمان و ڕێبازی پیرۆزی بارزانی دەکەین.
لەدەستدانی ئەو کەسایەتییە پێگە بەرزە وەک نەوەی ڕێبەری نیشتمانی و ئایینی نەمر (شێخ عەبدولسەلام بارزانی)، خەم و کۆستێکی گەورەیە بۆ ئێمە و بۆ هەموو لایەک. دووبارە پرسە و سەرەخۆشیی خۆمان دووپات دەکەینەوە و هیواخوازین تەمەنی جەنابتان درێژ بێت و دووربن لە خەم و ناخۆشی دیکە، لە خوای گەورە داواکارین ڕۆحی پاکی کۆچکردوو بخاتە بەر ڕەحمەت و دلۆڤانی خۆی و بە بەهەشتی بەرینی شاد بکات.
اناللە وانا الیە راجعون
مەکتەبی سیاسیی پارتی دیموکراتی کوردستان
٦ـی ئەیلوولی ٢٠٢٦
کۆمێنت (0)
تا ئێستا هیچ کۆمێنتێک نەکراوە.