دادوەرێکی سەربازیی ئەمریکا بڕیاری دا کە خالید شێخ محەمەد، کە بە داڕێژەری سەرەکیی هێرشەکانی 11ی سێپتەمبەری ساڵی 2001 تۆمەتبار دەکرێت، لە مانگی حوزەیرانی ساڵی 2028 ڕووبەڕووی دادگا ببێتەوە. ئەم بڕیارە دوای چەندین ساڵ لە ئاڵۆزیی یاسایی و مشتومڕ لەسەر شێوازی بەڕێوەچوونی پڕۆسەی دادگاییکردنەکە دێت.
خالید شێخ محەمەد لەگەڵ سێ تۆمەتباری تری هاوبەشی بە ناوەکانی وەلید بن عەتتاش، عەلی عەبدولعەزیز عەلی و مستەفا ئەحمەد ئەلحەوساوی دادگایی دەکرێن. مایکڵ شراما، دادوەری سەربازی، ئەو وادەیەی ڕەتکردەوە کە لە لایەن داواکاری گشتییەوە بۆ دەستپێکردنی دادگاییکردنەکە لە کانوونی دووەمی 2027 پێشنیار کرابوو، و بڕیاری دا وادەکە بۆ 18 مانگی تر دوابخرێت تاوەکو ئامادەکارییەکان تەواو دەبن.
ئەم وادە نوێیە دوای ئەوە ڕاگەیەندرا کە هاوینی ڕابردوو دادگایەکی تێهەڵچوونەوەی فیدراڵ، ڕێککەوتنێکی پێشوەختەی ڕەتکردەوە کە ڕێگەی بە خالید شێخ محەمەد دەدا دان بە تاوانەکانیدا بنێت لە بەرامبەر ئەوەی سزای لەسێدارەدانی بەسەردا جێبەجێ نەکرێت. تۆمەتبارەکان لە ساڵی 2008ەوە بە فەرمی بە تاوانی جەنگ و کوشتنی نزیکەی 3,000 کەس لە هێرشەکانی 11ی سێپتەمبەردا تۆمەتبار کراون.
پڕۆسەی دادگاییکردنی تۆمەتبارانی 11ی سێپتەمبەر بۆ ماوەی دوو دەیە بەهۆی چەندین ئاستەنگی یاساییەوە پەکخراوە. یەکێک لە کێشە سەرەکییەکان هەوڵی پارێزەرانی بەرگری بووە بۆ ئاشکراکردنی وردەکاریی ئەو ئەشکەنجانەی کە لە لایەن دەزگای هەواڵگریی ناوەندیی ئەمریکا (CIA) لە زیندانە نهێنییەکاندا بەرامبەر بە دەستگیرکراوەکان ئەنجامدراوە. خالید شێخ محەمەد کە لە ساڵی 2003 لە پاکستان دەستگیرکرا، لە ساڵی 2006ەوە لە بنکەی دەریایی گوانتانامۆ ڕاگیراوە. ڕاپۆرتێکی ئەنجوومەنی پیرانی ئەمریکا لە ساڵی 2014 ئاشکرای کرد کە ناوبراو لە کاتی لێکۆڵینەوەکاندا 183 جار ڕووبەڕووی "خاراندنی دەستکرد" (Waterboarding) بووەتەوە، کە ئەمەش مشتومڕێکی زۆری لەسەر شەرعییەتی ئەو بەڵگانە دروست کردووە کە لە ژێر فشاردا لێی وەرگیراون.
کۆمێنت (0)
تا ئێستا هیچ کۆمێنتێک نەکراوە.