وەزارەتی ناوخۆی حکوومەتی هەرێمی کوردستان، لە بڕیارێکی نوێدا ئاسانکارییەکی گەورە بۆ بازرگانان و خاوەن پێشەنگاکانی ئۆتۆمبێل و ماتۆڕسکیل ڕادەگەیەنێت و سەرجەم سزا داراییەکانی سەر شانیان لادەبات.
بەگوێرەی فەرمانی وزاری ژمارە (١٣٩٣٥) کە لە ڕێکەوتی 13-5-2026بە واژووی ڕێبەر ئەحمەد، وەزیری ناوخۆ دەرچووە، بڕیاردرا بە درێژکردنەوەی ماوەی ساڵێک بۆ تۆمارکردنی ئەو ئۆتۆمبێل و ماتۆڕسکیلانەی پێشتر هاوردە کراون.
ئەم هەنگاوەی وەزارەتی ناوخۆ لەپێناو بەرژەوەندی گشتی وڕەچاوکردنی دۆخی دارایی هاووڵاتیانە، بەتایبەت دوای ئەو لێکەوتە نەرێنییانەی بەهۆی بارودۆخی شەڕی نێوان (ئەمریکا و ئێران) کەوتە سەر کەرتی بازرگانی و کەسابەتی خەڵک، کە بووە هۆی ئەوەی بەشێکی زۆری ئۆتۆمبێلە هاوردەکراوەکان لە گەراج و پێشەنگاکان بمێننەوە و نەفرۆشرێن.
کێ لەم بڕیارە سوودمەند دەبێت؟
١- بازرگانانی ئۆتۆمبێل و ماتۆڕسکیل.
٢- خاوەن کۆمپانیاکانی هاوردەکردن.
٣- خاوەن پێشەنگاکان.
ئەو کەسانەی ئۆتۆمبێل و ماتۆڕسکیلیان هاوردە کردووە و
بەهۆی دۆخی شەڕەوە نەیانتوانیوە بیفرۆشن یان تۆماری بکەن، لە ڕێکەوتی دەرچوونی فەرمانەکەوە 1 ساڵ مۆڵەتیان بۆ درێژ دەکرێتەوە و هیچ سزایەکی داراییان ناکەوێتە سەر.
کۆمێنت (0)
تا ئێستا هیچ کۆمێنتێک نەکراوە.