ڕۆژنامەی "وۆڵ ستریت جۆرناڵ"ی ئەمریکی بڵاویکردەوە، دۆناڵد ترەمپ، سەرۆکی ویلایەتە یەکگرتووەکانی ئەمریکا بە یاریدەدەر و ڕاوێژکارەکانی ڕاگەیاندووە کە ئامادەیە هەنگاو بنێت بۆ کۆتاییهێنان بە جەنگ و ململانێکان، تەنانەت ئەگەر گەرووی هورمز وەک ڕێڕەوێکی سەرەکیی وزە بە داخراویش بمێنێتەوە.
بەپێی ڕاپۆرتەکەی وۆڵ ستریت جۆرناڵ، ئەم هەڵوێستەی ترەمپ نیشاندەری گۆڕانکارییەکی ستراتیژییە لە سیاسەتی دەرەوەی ئەمریکا، کە تێیدا جەخت لەسەر ڕاگرتنی خوێنڕشتن و تێچووە سەربازییەکان دەکرێتەوە وەک ئەولەویەت، تەنانەت ئەگەر مەترسی لەسەر بەشێک لە ڕێڕەوە ئاوییە نێودەوڵەتییەکانیش مابێت. چاودێرانی سیاسی ئاماژە بەوە دەدەن کە ئەم بڕیارە دەکرێت وەک فشارێک بێت بۆ سەر لایەنە ناکۆکەکان تاوەکو بێنە سەر مێزی گفتوگۆ، چونکە نیشانی دەدات کە واشنتن چیتر نایەوێت ببێتە بەشێک لە جەنگێکی درێژخایەن کە زیانی ئابووریی جیهانی لێبکەوێتەوە.
هورمز یەکێکە لە هەستیارترین خاڵە ستراتیژییەکانی جیهان، کە نزیکەی 20%ی نەوتی خاوی جیهانی لێوە تێپەڕ دەبێت. هەرچەندە داخستنی گەرووەکە لەلایەن ئێرانەوە هەمیشە وەک هەڕەشەیەکی گەورە بۆ سەر ئابووریی جیهان تەماشا کراوە، بەڵام ئیدارەی نوێی ئەمریکا دەیەوێت لە ڕێگەی هاوسەنگییەکی نوێی هێز و سوودوەرگرتن لە سەرچاوە ناوخۆییەکانی وزە، کاریگەریی ئەو هەڕەشانە کەم بکاتەوە و کۆتایی بە "جەنگە بێکۆتایییەکان" لە ڕۆژهەڵاتی ناوەڕاست بهێنێت.
کۆمێنت (0)
تا ئێستا هیچ کۆمێنتێک نەکراوە.