پارێزگاری هەولێر داوا لە حکوومەتی فیدراڵ دەکات بەرپرسیارێتیی یاسایی هەڵبگرێت و قەرەبووی زیانلێکەوتووانی هێرشەکانی سەر پایتەخت بکاتەوە، هاوکات لیژنەی خەمڵاندنی زیانەکانیش بۆ ئامادەکردنی لیستی وردی زەرەرمەندان ڕادەسپێرێت.
ئەمڕۆ یەکشەممە، بە سەرپەرشتی ئومێد خۆشناو پارێزگاری هەولێر و بە ئامادەبوونی جێگری پارێزگار و قائیمقامی ناوەندی، کۆبوونەوەیەکی تایبەت لەگەڵ "لیژنەی خەمڵاندنی زەرەر و زیانەکان" لە دیوانی پارێزگا بەڕێوەچوو.
پارێزگاری هەولێر لیژنەکەی ڕاسپارد کە بە وردی لیستی ناوی ئەو هاووڵاتی و شوێنە گشتییانە ئامادە بکەن کە لە ڕێکەوتی 28ی شوبات تاوەکوو ئەمڕۆ، بەهۆی هێرش و بۆردومانەکانی گروپە لەیاسادەرچووەکانەوە تووشی زیانی ماددی و مرۆیی بوونە.
ئومێد خۆشناو داوای لە حکوومەتی عێراق کرد کە لە چوارچێوەی "بودجەی فریاکەوتن"دا بەرپرسیارێتیی یاسایی خۆی هەڵگرێت و قەرەبووی سەرجەم ئەو هاووڵاتی و لایەنانە بکاتەوە کە بەهۆی ئەو هێرشە تیرۆریستییانەوە زیانمەند بوون.
لە تەوەرێکی تری کۆبوونەوەکەدا، پارێزگار داوای لە میدیاکان کرد لە کاتی ڕووماڵکردنی شوێنە زیانلێکەوتووەکاندا پابەندی ڕێنماییەکانی "فەرمانگەی میدیا و زانیاری" بن. جەختیشی کردەوە کە پێویستە تاوانەکان بە شێوەیەکی پیشەیی نیشانی جیهان بدرێن و دووربکەونەوە لە بڵاوکردنەوەی هەواڵی ناڕاست و شێواندنی ئامارەکان.
کۆمێنت (0)
تا ئێستا هیچ کۆمێنتێک نەکراوە.