مەترانییەتی کلدانی لە زاخۆ بروسکەیەکی سەرەخۆشی ئاراستەی مەسرور بارزانی کرد

مەترانییەتی کلدانی لە زاخۆ، لە بروسکەیەکی هاوخەمیدا بۆ مەسرور بارزانی سەرۆکی حکومەتی هەرێمی کوردستان سەرەخۆشی و هاوخەمی قووڵی خۆی بۆ شەهیدبوون و برینداربوونی پێشمەرگە و کارمەندانی هێزە ئەمنییەکان لە هەولێر دەربڕی. مەترانییەتەکە وێڕای بەرزنرخاندنی قوربانییەکانی هێزە ئەمنییەکان لە پێناو پاراستنی نیشتمان، بەبۆنەی جەژنەکانی قیامەت و تێپەڕبوون (الفصح) هیوای سەقامگیری و ئاشتی بۆ هەرێمی کوردستان و جیهان دەخوازێت.

دەقی بروسکەکە:

بۆ/ جەنابی كاك مەسرور بارزانی

سەرۆکی حکومەتی هەرێمی کوردستانى بەڕێز

م/ بروسکەی سەرەخۆشی

مەترانیەتی زاخۆ بۆ کلدان، سەرەخۆشی و هاوخەمی قووڵی خۆی ئاراستەی بنەماڵە و کەسوکاری شەهیدان و بریندارانی هێزەکانی پێشمەرگە لە هەولێر، و سەرجەم ئەندامان و کارمەندانی هێزە ئەمنییەکانی هەرێمی کوردستان دەکات، لە پای ئەو قوربانیانەی پێشکەشی دەکەن لە پێناو پاراستنی خاکەکەمان و هاووڵاتیانمان.

لە خودای گەورە داواکارین، قوربانییەکان بە ڕەحمەتی خۆی شاد بکات، و ناوچەکەمان و وڵاتمان لە هەموو زیان و بەڵایەک بپارێزێت.

بەبۆنەی نزیکبوونەوەی جەژنەکانی قیامەت و تێپەڕبوون (الفصح)ى پیرۆز، داواکارین ئاسایش و ئاشتی باڵ بکێشێت بەسەر وڵاتمان و هەموو جیهاندا.

هەمیشە لەژێر پارێزگاری خودای مەزن دابن،

مەتران فێلیکس سەعید شابی

مەترانی ئەبڕەشیەیی زاخۆ بۆ کلدان