نێردەی تایبەتی سەرۆکی ئەمریکا بۆ رۆژهەڵاتی ناوەروست بەبۆنەی جەژنی ڕەمەزانەوە پەیامێکی پیرۆزبایی ئاراستەی گەلانی ناوچەکە و جیهانی ئیسلامی دەکات و دەڵێت جەژن دەرفەتێکە بۆ تێپەڕاندنی ئەم دۆخە
تۆم باراک نێردەی تایبەتی سەرۆکی ئەمریکا لە پەیامەکەیدا دەڵێت: لەم کاتەدا کە ناوچەکە بە دۆخێکی ئاڵۆزدا تێدەپەڕێت، جەژن دەبێتە دەرفەتێک بۆ تێڕامانی بێدەنگ و دروستبوونی هیوا. ئاماژە بەوەش کراوە کە تەنانەت لە کاتی گرژییەکان و نادیاریی ئاییندەشدا، گۆڕانکارییە ڕاستەقینەکان لە هەنگاوی بچووکەوە دەست پێدەکەن؛ وەک لێبوردەیی و میهرەبانی کە دەبنە هۆی دروستکردنەوەی پردی متمانە و لێکتێگەیشتن لە نێوان مرۆڤەکاندا.
هەر لە پەیامەکەدا جەخت کراوەتەوە، کە ئەم هەڵبژاردنە ژیرانە و هەنگاوە بچووکانە دەبنە هۆی کەمکردنەوەی ئاستی گرژییەکان و گۆڕینی دووبەرەکی بۆ گفتوگۆ و نەیارەکانیش دەکاتە هاوسێی یەکتر.
لە کۆتایی پەیامەکەدا، جارێکی دیکە جەخت لەسەر پابەندبوون بە ڕێگەی ئاشتی، خۆشگوزەرانیی هاوبەش و تێگەیشتنی قووڵ کرایەوە و هیوای جەژنێکی پڕ لە شادی، تەندروستی و ئارامی بۆ هەمووان و ئازیزانیان خوازرا
کۆمێنت (0)
تا ئێستا هیچ کۆمێنتێک نەکراوە.