نرخی نەوت و گاز لە بازاڕەکانی جیهان بەرزبوونەوەیەکی بەرچاوی تۆمارکرد ویەک بەرمیل نەوتی خاوی برێنت بە ڕێژەی 4.98% بەرزبووەوە
لە دواین مامەڵەکانی بازاڕی وزە لەسەر ئاستی جیهان، نرخی نەوتی خاو و گازی سروشتی بەرزبوونەوەی بەرچاویان بەخۆیەوە بینی و نرخی نەوتی برێنت ئاستێکی پێوانەیی نوێی تۆمارکرد.
بەپێی ئامارە بڵاوکراوەکانی بازاڕی جیهانی وزە، نرخی یەک بەرمیل نەوتی خاوی برێنت بە ڕێژەی 4.98% بەرزبووەوە و گەیشتە 112.7 دۆلار، هاوکات نرخی نەوتی خاوی تەکساس (WTI) بە ڕێژەی 0.66% ڕووی لە بەرزبوونەوە کرد و گەیشتە 96.96 دۆلار بۆ هەر بەرمیلێک.
هەر لە چوارچێوەی گۆڕانکارییەکانی بازاڕدا، نرخی نەوتی موربان بە 116.8 دۆلار بە جێگیری مایەوە و هیچ گۆڕانکارییەکی بەسەردا نەهات.
لەلایەکی دیکەوە، نرخی گازی سروشتی هاوشێوەی نرخی نەوت ڕووی لە بەرزبوونەوە کرد و بە ڕێژەی 3.16% نرخەکەی زیادی کرد، بە جۆرێک لە ئێستادا یەکەیەکی گازی سروشتی بە 3.162 دۆلار لە بازاڕەکاندا مامەڵەی پێوە دەکرێت.
کۆمێنت (0)
تا ئێستا هیچ کۆمێنتێک نەکراوە.