پۆلیسی هەولێر دەستگیركردنی ئەو تۆمەتبارەی راگەیاند كە ئەمڕۆ دووشەممە مامۆستا دلێر ساڵح مامۆستای زانكۆی سەڵاحەدینی لە ماڵەكەی خۆیدا كوشتبوو و دواتریش ئاگری لە ماڵەكەیان بەردابوو.
پۆلیسی هەولێر لە روونكردنەوەیەكدا رایگەیاند: ئەمڕۆ دووشەممە دوای ئەوەی لە گەڕەکی (ئاری - شۆڕش) لە شاری هەولێر ئاگر لە ماڵێک کەوتەوە، دەستبەجێ تیمەکانمان گەیشتنە شوێنی ڕووداوەکە و لە لێکۆڵینەوەکاندا دەرکەوت کە مامۆستایەکی زانکۆ بەناوی (دکتۆر دلێر ساڵح) کە سەرۆکی بەشی زانستی کۆمپیوتەر بوو لە کۆلێژی زانستی زانکۆی سەڵاحەددین، کوژراوە و تەرمەکەی و ماڵەکەشی سوتێنراوە.
پۆلیسی هەولێر راشیگەیاند: هەر زوو توانیمان ناسنامەی تۆمەتبار دەستنیشان بکەین بەناوی (ز. ع. ح. ع) خەڵکی دیالە لەدایکبووی (2005) و دوای کوشتی دکتۆر دلێر، ئۆتۆمبێلەکەشی بردووە و کاتژمێر (12:39) خولەک هەولێری جێهێشتووە.
ئاماژەی بەوەش دا "بە هەماهەنگی لەگەڵ وەزارەتی ناوخۆی حکوومەتی فیدراڵ بەتایبەت بەڕێوەبەری پۆلیسی پارێزگای کەرکووک و دیالە، کاتژمێر (5:30) خولەکی ئێوارەی ئەمڕۆ تۆمەتبار لە بازگەی (خان بەنی سەعد) لە دیالە بە خۆی و ئۆتۆمبێلەکەوە دەستگیر کرا.
پۆلیسی هەولێر جەختیشی كردەوە كە هەماهەنگی کراوە بۆ ئەوەی تۆمەتباری بکوژ بۆ گرتنەبەری ڕێکارە یاساییەکان، ڕادەستی دادگا بکرێت.
کۆمێنت (0)
تا ئێستا هیچ کۆمێنتێک نەکراوە.