ئاسایشی هەولێر ئاگادارییەكی بۆ سەرجەم هاووڵاتییان بڵاو كردەوە كە تێیدا هاتووە "هەر كەسێك وێنە و ڤیدیۆی راستەوخۆ یان ڤیدۆی کامێرای چاودێری شوێنی هێرش و رووداوەكان بڵاو بكاتەوە، رێكاری یاسایی بەرامبەر دەگرینەبەر".
لە ئاگادارییەكەی ئاسایشی هەولێر كە ئەمشەو پێنجشەممە بڵاوكراوەتەوە هاتووە "لەپێناو پاراستنی ئاسایشی نیشتمانی و پاڵپشت بە ڕێنمایی فەرمی حکوومەتی هەرێمی کوردستان، ئاگاداری هاووڵاتییان دەکەینەوە کە هەر كەسێك گرتەڤیدیۆی کامێراکانی چاودێری شوێنی ڕووداوەکان بڵاو بکاتەوە، یان بیدات بە کەناڵەکانی ڕاگەیاندن، هەروەها بڕواتە شوێنی ڕووداوەکان و وێنەی بگرێت و ڕاستەوخۆ بکاتەوە ڕێکاری یاسای بەرامبەر دەگرینەبەر و خۆی بەرپرسیار دەبێت بەرامبەر بە یاسا".
لە ئاگادارییەكەی ئاسایشی هەولێر هەروەها هاتووە "لە کاتی بوونی هەر ڕووداوێک یان ناردنی فایلی ڤیدیۆ و زانیاری دەتوانن پەیوەندیمان پێوە بکەن".
هەر ئەمشەو پێنجشەممە لە كاتێكی دیكەدا فەرمانگەی میدیا و زانیاری حكوومەتی هەرێمی كوردستانیش چەند رێنماییەكی بۆ هاووڵاتییان و دەزگاكانی راگەیاندن سەبارەت بە وێنەگرتن لە كاتی هێرش و بۆردومانەكاندا بڵاو كردەوە كە بریتین لە مانەی خوارەوە:-
یەكەم/ هەر كەسێك ڤیدیۆی كەوتن یان ئاراستەكردنی درۆن بگرێت، با تەنیا بۆ ژمارەی فەرمانگەی میدیا و زانیاری بنێرێت، چونكە بەهەموو شێوەیەك قەدەغەیە بدرێتە میدیاكان، یان لە پەیج و هەژماری كەسی بڵاو بكرێتەوە، بەپێچەوانەوە سەرپێچیكار رووبەڕووی لێپرسینەوە دەبێتەوە.
دووەم/ نزیكبوونەوە لەو شوێنانەی كراونەتەوە ئامانج، یان وێنەگرتن و بڵاوكردنەوەی دیمەنەكانیان بەهەموو شێوەیەك قەدەغەیە.
سێیەم/ دەزگاكانی راگەیاندن دەبێت بەوپەڕی بەرپرسیارێتییەوە مامەڵە بكەن و شوێنی رووداوەكان ئاشكرا نەكەن، هەر كەناڵێك پابەند نەبێت رێكاری یاسایی توندی لە بەرامبەر دەگیرێتەبەر.
کۆمێنت (0)
تا ئێستا هیچ کۆمێنتێک نەکراوە.