بەڕێوبەرایەتیی گشتیی کەشناسی و بومەلەرزەزانی هەرێمی کوردستان ڕەوشی کەشوهەوای 48 کاتژمێری داهاتووی خستەڕوو و ڕایگەیاند، ناسەقامگیریی کەشوهەوا بەردەوام دەبێت و هۆشداریی لێزمە باران لە گەرمیان دەدرێت.
ڕۆژی پێنجشەممە 12ـی شوبات، بەڕێوبەرایەتیی کەشناسی و بومەلەرزەزانی ڕایگەیاند: بە گشتی ئاسمان نیمچە هەور و هەندێ ناوچەی شاخاوی هەوری تەواو دەبێت لەگەڵ نمە بارانی پچڕ پچڕ بە تایبەت لەسەر ناوچە شاخاوییەکان لە هەندێ کاتدا. سەنتەری پاڕێزگاکان تەنها پارێزگای سلێمانی و دهۆک ئەگەری نمە بارانێکی کەمی هەیە.
لە ڕاگەیەندراوەکەدا هاتووە: بە گشتی ناسەقامگیری کەشی ناوچەکەمان بەردەوامی دەبێت بۆیە ئەگەر هەیە گۆڕانکاری لە کەشی ناوچەیەک لە ماوەیەکی کەم دروست بێت و باران بارین ببێت لەسەر ئەو ناوچەیە .هەروەها پلەی گەرما نزیک دەبیتەوە لە تۆمارکراوەکانی دوێنێ.
بۆ سبەی هەینی 13ـی شوبات، کەشناسی پێشبینی دەکات: ئاسمانی هەرێم بە گشتی بەردەوام نیمچە هەور و لە هەندێ کاتدا هەوری تەواو دەبێت، ئەگەری باران لە هەندێ کاتدا لەسەر ناوچە شاخاوییەکان دەبێت بە شێوەی نمە باران و ناوچە شاخاوییە بەرزەکان ئاستی دابارینی زیاتر دەبێت. سەنتەری پارێزگاکان بەردەوام ئاسمانی نیمچە هەور دەبێت.
کەشناسی ڕاشیگەیاند: سبەی ئەگەری زیاد بوونی باران لەسەر بەشێک لە ئیدارەی گەرمیان هەیە هەندێ کات ئەگەری لێزمە باران هەیە و هەورە تریشقەشی لەگەڵ دەبێت هەروەها پلەی گەرما بەرزتر دەبێتەوە لە تۆمارکراوەکانی ئەمڕۆ.
بەرزترین پلەی گەرمای پێشبینیکراو بۆ ئەمڕۆ و سبەی بە پلەی سیلیزی:
| شار و ناوچە جیاجیاکانی هەرێمی کوردستان | پێنجشەممە | هەینی |
| هەولێر | 17 | 18 |
| سلێمانی | 16 | 16 |
| دهۆک | 14 | 16 |
| هەڵەبجە | 18 | 17 |
| چەمچەماڵ | 17 | 17 |
| گەرمیان | 19 | 18 |
| زاخۆ | 14 | 17 |
| سۆران | 13 | 13 |
| حاجی ئۆمەران | 7 | 6 |
| پیرمام | 12 | 13 |
کۆمێنت (0)
تا ئێستا هیچ کۆمێنتێک نەکراوە.