سەرۆكایەتی كۆماری سووریا رایگەیاند، دۆناڵد ترەمپ سەرۆكی ئەمریكا و ئەحمەد شەرع سەرۆكی سووریا پەیوەندییەكی تەلەفۆنییان ئەنجام دا، لە پەیوەندییە تەلەفۆنییەكەدا هەردوولا جەختیان لە پێویستی دەستەبەرکردنی مافەکان و پاراستنی گەلی کورد لە سووریا كردەوە.
سەرۆكایەتی كۆماری سووریا ئەمشەو دووشەممە لە راگەیەنراوێكدا بڵاوی كردەوە: ئەحمەد شەرع سەرۆك كۆماری سووریا پەیوەندییەکی تەلەفۆنی لەگەڵ دۆناڵد ترەمپ سەرۆکی ئەمریکا ئەنجام دا.
بڵاویشی كردەوە: لە پەیوەندییە تەلەفۆنییەكەدا هەردوولا جەختیان لە گرنگی پاراستنی یەکپارچەیی و سەربەخۆی خاكی سووریا کردەوە.
هەروەها بڵاوی كردۆتەوە: هەردوو سەرۆك جەختیان لە پێویستی دەستەبەرکردنی مافەكان و پاراستنی گەلی کورد لە چوارچێوەی دەوڵەتی سووریا کردۆتەوە.
ئاماژە بەوەشدراوە "ئەحمەد شەرع و دۆناڵد ترەمپ رێککەوتوون لەسەر بەردەوامی هاوکارییەكانیان بۆ كۆتاییهێنان بە هەڕەشەكانی داعش".
لە كۆتایی راگەیەنراوەكەی سەرۆكایەتی كۆماری سووریا هاتووە "هەر لە پەیوەندییە تەلەفۆنییەكەدا چەندین بابەتی دیكەی هەرێمی لەنێوان ئەحمەد شەرع و دۆناڵد ترەمپ تاوتوێ كران، لەگەل جەختكردنەوە لەسەر گرنگی پێدانی دەرفەتێكی نوێ بە سووریا بۆ هەنگاونان بەرەو داهاتوویەكی باشتر.
کۆمێنت (0)
تا ئێستا هیچ کۆمێنتێک نەکراوە.