سەرۆک بارزانی سەبارەت بە شەڕ و ئاڵۆزییەکانی نێوان حکوومەتی سووریا و هێزەکانی سووریای دیموکرات پەیامێکی بڵاو کردەوە و هیوای خواست بە زووترین کات ئەو شەڕ و ئاڵۆزی و گرژییانە ڕابگیرێن و هەموو لایەک بۆ ئەو ڕێککەوتنانە بگەڕێنەوە کە پێشتر بۆ چارەسەرکردنی کێشەکان و گەیشتن بە سەقامگیری لەنێوان لایەنەکانی سووریا بەستراون.
دەقی پەیامی سەرۆک بارزانی
بەناوی خودای مەزن و دلۆڤان
سەبارەت بە دوایین پەرەسەندن و گۆڕانکارییەکانی سووریا و لە چوارچێوەی هەوڵدان بۆ چارەسەرکردنی کێشەکان، دوێنێ کۆبوونەوەیەکی هاوبەشی گرنگمان لەگەڵ نێردەی تایبەتی سەرۆک ترامپ بۆ کاروباری سووریا و فەرماندەی گشتیی هێزەکانی سووریای دیموکرات و سەرۆکی ئەنەکەسە هەبوو.
هیوادارین بە زووترین کات ئەو شەڕ و ئاڵۆزی و گرژییانە ڕابگیرێن کە ئێستا لەنێوان هێزەکانی حکوومەتی سووریا و هێزەکانی سووریای دیموکرات لە ئارادایە و هەموو لایەک بۆ ئەو ڕێککەوتنانە بگەڕێنەوە کە پێشتر بۆ چارەسەرکردنی کێشەکان و گەیشتن بە سەقامگیری لەنێوان لایەنەکانی سووریا بەستراون. هەروەها دەرچوونی مەرسوومی سەرۆکی سووریا لەبارەی مافەکانی کورد بە هەنگاوێکی ئیجابی و ئاراستەی دروست دەزانین و هیوادارین ببێتە زەمینەیەک بۆ ئەوەی بە ڕەزامەندیی لایەنە پەیوەندیدارەکان دەوڵەمەند بکرێت و بە شێوەیەکی یاسایی و دەستوری، گەرەنتیی مافەکانی گەلی کوردی لەسەر بنیات بنرێت.
مسعود بارزانی
18ی کانوونی دووەمی 2026
کۆمێنت (0)
تا ئێستا هیچ کۆمێنتێک نەکراوە.