وەزارەتی پەروەردەی حکوومەتی هەرێمی کوردستان، بڕیارێکی نوێی لە بەرژەوەندی قوتابیان دەرکرد و تێیدا بەشێک لە پڕۆگرامی خوێندنی بۆ تاقیکردنەوە کۆتاییەکان کەمکردەوە.
ڕۆژی چوارشەممە، 14ـی کانوونی دووەم، وەزارەتی پەروەردە ڕایگەیاند: بەپێی نووسراوێکی فەرمی وەزارەت کە ئاراستەی سەرجەم بەڕێوەبەرایەتییە گشتییەکانی پەروەردە لە هەولێر، سلێمانی، دهۆک، گەرمیان، هەڵەبجە، سۆران، زاخۆ و ڕاپەڕین کراوە، بڕیاردراوە ئەو بابەتانەی لە خشتەی هاوپێچی نووسراوەکەدا هاتوون، بۆ تاقیکردنەوەکان داواکراو نەبن.
لە ڕاگەیەندراوەکەدا هاتووە: بۆ پۆلی 12ـی ئامادەیی کەمکردنەوەکە لقی زانستی و وێژەیی دەگرێتەوە و ئەو بابەتانە لە تاقیکردنەوە گشتییەکاندا (وزاری) نایەنەوە وە هەروەها بۆ پۆلی 9ـی بنەڕەتیش بابەتە دیاریکراوەکان لە تاقیکردنەوەی نیشتمانیی پۆلی نۆدا داواکراو نابن.
وەزارەتی پەروەردە: ئەم بڕیارە بۆ ساڵی خوێندنی 2025- 2026 و ساڵانی داهاتووش کارا دەبێت، تا ئەو کاتەی لە لایەن بەڕێوەبەرایەتی گشتی پڕۆگرامەکان و چاپەمەنییەکانەوە پەرتووکی خوێندن سەرلەنوێ ئامادە دەکرێتەوە و گشتاندنی نوێی بۆ دەکرێت.
وەزارەتی پەروەردە ئاماژەی بەوە کردووە کە ئەم هەنگاوە تەنها لە پێناو بەرژەوەندیی قوتابیان و خوێندکاران نراوە، بۆ ئەوەی لە کاتی تاقیکردنەوە کۆتاییەکاندا بارگرانییان لەسەر کەم ببێتەوە.
ئەم لینکە دابگرە
کۆمێنت (0)
تا ئێستا هیچ کۆمێنتێک نەکراوە.