ئەمڕۆ ئومێد خۆشناو، پارێزگاری هەولێر، پەیامێکی پیرۆزبایی ئاراستەی سەرۆک و دەستەی کارگێڕی هاندەرانی یانەی وەرزشیی زاخۆ کرد، ئەوەش بەبۆنەی بەدەستهێنانی خەڵاتی جیهانیی (FIFA) وەک باشترین هاندەر.
لە پەیامەکەیدا پارێزگاری هەولێر وێڕای پیرۆزبایی لە یانەکە و جەماوەرەکەی، ئاماژەی بەوە داوە کە بەدەستهێنانی ئەم نازناوە جیهانییە، دەستکەوتێکی گەورەی وەرزشییە.
ئومێد خۆشناو ڕایگەیاند: ''بەبۆنەی بەدەستهێنانی خەڵاتی فیفا بۆ باشترین هاندەری جیهان، پیرۆزبایی ئەو سەركەوتنە مەزنە وەرزشییە لە ئێوە و تەواوی خەڵكی كوردستان دەكەین، بەتایبەت ئەوانەی كە پاڵپشتی هاندەرانی یانەكەتان بوون و دەنگیان بە زاخۆ دا''.
لە بەشێکی دیکەی پەیامەکەدا، پارێزگاری هەولێر جەختی کردۆتەوە کە گرنگی ئەم خەڵاتە لەوەدایە تەنها سەرکەوتنێک نییە بۆ یانەی زاخۆ، ''بەڵکو شانازییەكە بۆ هەموو كوردستان و وەرزشوان و وەرزشدۆستانی''.
لە کۆتاییدا پارێزگاری هەولێر هیوای سەرکەوتنی زیاتر و بەردەوامی بۆ یانەی زاخۆ و وەرزشی کوردستان خواستووە.
کۆمێنت (0)
تا ئێستا هیچ کۆمێنتێک نەکراوە.