وەزارەتی کشتوکاڵ و سەرچاوەکانی ئاوی حکوومەتی هەرێمی کوردستان، ئاماری کاریگەرییەکانی دواین شەپۆلی بارانبارین و لافاوی بۆ سەر بەنداوەکانی هەرێم بڵاو کردەوە و ڕایگەیاند، بەهۆی بارانبارینی دوو ڕۆژی ڕابردووەوە بڕێکی زۆر باش ئاو لە بەنداوەکاندا خەزن کراوە.
بەپێی ڕاگەیەندراوەکەی وەزارەتی کشتوکاڵ و سەرچاوەکانی ئاو، کاریگەریی شەپۆلەکە بەشێوەیەک بووە کە تەنها لە هەردوو بەنداوی گەورەی دووکان و دەربەندیخان، زیاتر لە ١٠٠ ملیۆن مەتر سێجا ئاو گل دراوەتەوە.
لەبارەی ئاستی زیادبوونی ئاوی ئەو دوو بەنداوە، وەزارەتەکە ئاشکرای کردووە: "ئاستی ئاوی بەنداوی دەربەندیخان ١.٥ مەتر و بەنداوی دوکان ٧٠ سانتیمەتر زیادیان کردووە."
سەبارەت بە بەنداوە بچووکەکان و پۆندەکان، ئامارەکان دڵخۆشکەرن و بەم شێوەیە دابەش بوون:
سنووری گەرمیان و سلێمانی: سەرجەم بەنداوە بچووکەکان پڕ بوون لە ئاو.
سنووری هەولێر: یەک بەنداو پڕ بووە و سەرڕێژی کردووە، بەنداوەکانی دیکەش ئاویان تێدا کۆ کراوەتەوە.
سنووری دهۆک: ئاوی بەنداوەکان زیادیان کردووە بەڵام بەراورد بە ناوچەکانی دیکە بە ڕێژەیەکی کەمتر. باران باریوە.
لە کۆتاییدا وەزارەتی کشتوکاڵ ئاماژەی بەوە داوە کە کاریگەریی ئەم شەپۆلە کۆتایی نەهاتووە و لە ڕۆژانی داهاتووشدا زیادبوونی ئاوی بەنداوە گەورەکان بەردەوام دەبێت.
کۆمێنت (0)
تا ئێستا هیچ کۆمێنتێک نەکراوە.