بەڕێوەبەرایەتی گشتی حەج و عومڕەی کوردستان ئەمڕۆ پێنجشەممە لە هەرسێ پارێزگای هەولێر و سلێمانی و دهۆک تاقیکردنەوەی مورشیدی ئایینی بۆ نزیكەی 400 مامۆستای ئایینی ئەنجام دا كە بڕیارە سەركەوتووەكان لە فەریزەی حەجی ساڵی داهاتوو 2026 بەشداربن.
کاروان ستوونی گوتەبێژی حەج و عومڕەی کوردستان ڕایگەیاند: لەسەر فەرمانی وەزیری ئەوقاف و کاروباری ئایینی، لیژنەیەکی باڵا لەسەر ئاستی هەرێمی کوردستان پیک هێنرا بۆ ئەنجامدان و هەڵسەنگاندنی مامۆستایانی ئایینی لە هەموو هەرێمی کوردستان بۆ وەرزی حەجی 2026 کە بە شێوەی ئەلیکترۆنی ناویان تۆمار کردبوو.
کاروان ستوونی ڕاشیگەیاند: تاقیکردنەوەکە لە کەشێکی ئارام بە هاوکاری بەڕێوەبەرایەتی ئەوقافەکان لە پارێزگا و ئیدارە سەربەخۆکان و شارۆچكە و شارەدێكان بە سەرکەوتوویی بەڕێوەچوو کە ژمارەیان نزیکەی 400 مامۆستای ئایینی دەبن و هەر مامۆستایەک نمرەی 75% بەدەست بهێنێت، ناوی دەچێتە تیروپشکەوە کە بڕیارە لە چەند رۆژی داهاتوو ئەنجام بدرێت.
لە کابینەی نۆیەمی حکوومەتی هەرێمی کوردستان گرنگی زۆر بە مامۆستایانی ئایینی دراوە و نزیکەی 180 مامۆستای ئایینی پرۆسەی حەجیان بە خۆرایی ئەنجامداوە و زیاتر لە 700 مامۆستای ئایینی عومڕەیان بەبێ بەرامبەر ئەنجامداوە.
کۆمێنت (0)
تا ئێستا هیچ کۆمێنتێک نەکراوە.