نێردەی ئەمریکا لە عێراق: دەبێت عێراق لە دەستێوەردانی زیانبەخشی ئێران و پرۆکسییەکانی بە دووربێت

.نێردەی ئەمریکا لە عێراق ڕایگەیاند بەرژەوەندییەکانی گەلی عێراق و ناوچەکە بە گشتی پشت بە عێراقێکی تەواو خاوەن سەروەری، بەدوور لە دەستێوەردانی دەرەکیی زیانبەخش، لەوانەش ئێران و گروپە نزیکەکانی دەبەستێت

ڕۆژی هەینی، 31ـی تشرینی یەکەم، مارک ساڤایا، نێردەی ئەمریکا لە عێراق، لە پلاتفۆرمی خۆی لە تۆڕی کۆمەڵایەتیی ئێکس ڕایگەیاند: لە ماوەی سێ ساڵی ڕابردوودا، سەرکردایەتیی عێراق هەنگاوی گرینگیان ناوە بۆ ڕێنماییکردنی وڵاتەکە بۆ ئاراستەیەکی دروست لە هەردوو ڕووی سیاسی و ئابووری. ئاماژەی بەوەش کردووە "عێراق دەستی کردووە بە دووبارە دەرکەوتنەوە وەک دەوڵەتێکی خاوەن سەروەری و کار بۆ کەمکردنەوەی کاریگەرییە دەرەکییەکان دەکات".
ساڤایا ڕاشیگەیاند: عێراق هەموو چەکەکان دەخاتە ژێر کۆنترۆڵی حکوومەت و بازاڕەکانی بەڕووی کۆمپانیا نێودەوڵەتییەکاندا دەکاتەوە بۆ یارمەتیدانی ئاوەدانکردنەوە و پەرەپێدانی ژێرخانی لاوازی وڵات، بەڵام کارەکە هێشتا تەواو نەبووە و عێراق هێشتا پێویستی بە پاڵپشتی بەردەوام هەیە بۆ مانەوە لەسەر ئەم ڕێچکەیە.
نێردەی ئەمریکا لە عێراق جەختی کردووەتەوە: ویلایەتە یەکگرتووەکانی ئەمریکا بە ڕوونی ڕایگەیاندووە کە هیچ شوێنێک بۆ گروپە چەکدارەکان نییە کە لە دەرەوەی دەسەڵاتی دەوڵەت کاربکەن. سەقامگیری و خۆشگوزەرانیی عێراق پشت بە هێزە ئەمنییە یەکگرتووەکان دەبەستێت لەژێر فەرماندەیی یەک حکومەت و فەرماندەی گشتی هێزە چەکدارەکان، یەکگرتوو لەژێر یەک ئاڵادا کە نوێنەرایەتیی هەموو عێراقییەکان دەکات. بەبێ ئەم یەکێتییە، سەروەری و پێشکەوتنی عێراق لە مەترسیدا دەمێنێتەوە.
مارک ساڤایا باسی لەوەش کردووە: بەرژەوەندییەکانی گەلی عێراق و ناوچەکە بە گشتی پشت بە عێراقێکی تەواو خاوەن سەروەری دەبەستێت، بەدوور لە دەستێوەردانی دەرەکیی زیانبەخش، لەوانەش ئێران و گروپە نزیکەکانی، و پابەندبوون بە خزمەتکردنی هاوڵاتییانی و ژیان بە ئاشتی لەگەڵ دراوسێکانی. لەم چوارچێوەیەدا، یەکێتی و هاوکاریی نێوان دەسەڵاتە فیدراڵی و هەرێمییەکانی عێراق زۆر گرینگن بۆ دڵنیابوون لە ئاسایشێکی درێژخایەن، گەشەی ئابووری و یەکگرتوویی نیشتمانی.
ساڤایا، جەختی کردەوە: عێراق وڵاتێکی گرنگی ناوچەکەیە و دەبێت لە پەرەپێدانی ئاشتی، ئاسایش و سەقامگیری ناوچەیی، ڕۆڵی سروشتیی خۆی بگێڕێت. ئاماژەی بەوەش کرد عێراق نابێت بگەڕێتەوە بۆ ڕابردوو یان شێوازێک بگرێتەبەر کە ڕێگر بێت لە پێشکەوتن و یەکێتی.
لە نووسراوەکەی نێردەی ئەمریکادا هاتووە: "ئەرکی منە، لە بری سەرۆک ترامپ، پەیوەندی لەگەڵ عێراق دروست بکەم و پاڵپشتیی بەردەوامبوونی بکەم لە گەڕان بەدوای سەقامگیری، سەروەری، و خۆشگوزەرانیدا".
مارک ساڤایا، لە کۆتاییدا باسی لەوە کردووە: عێراق هێشتا گرنگییەکی زۆری هەیە بۆ ناوچەکە و ویلایەتە یەکگرتووەکانی ئەمریکا. بە یەکێک لە بەهێزترین و بەنرخترین هاوبەشەکانی ئەمریکا دەمێنێتەوە، و من پابەندم بە زیاتر بەهێزکردنی ئەم پەیوەندییە کاتێک ئەم ڕۆڵە شەرەفمەندە وەک نێردە وەردەگرم.