لە ماوی کابینەی نۆیەمی حکوومەتی هەرێمی کوردستاندا شەش پرۆژەی ئاو جێبەجێ کراوە و پرۆژەیەکیش لە جێبەجێکردندایە. هەموو ئەم پرۆژانە بەگشتی ڕۆژانە 852 هەزار مەترس سێجا ئاو بۆ هاووڵاتییان دابین دەکەن.
بە پێی ئەو زانیارییانەی لە لایەن فەرمانگەی میدیا و زانیاریی حکوومەتی هەرێمی کوردستانەوە بڵاو کراوەتەوە، کابینەی نۆیەمی حکوومەت توانیویەتی لە ماوەی کاری خۆیدا هەر یەک لە پڕۆژەکانی فریاگوزاریی خێرای هەولێر، فایدە-دهۆک، دەربەندیخان، ئاکرێ، قوشتەپە و چوارقوڕنە-حاجیاوا تەواو بکات و پڕۆژەی ئاوی گۆپتەپە چەمچەماڵیش لە جێبەجێکردندایە.
هەموو ئەم پڕۆژانە لە ڕۆژێکدا توانای دابینکردنی 852 هەزار مەتر سێجا ئاوی پاکیان هەیە و بە گوژمەی 1 ترلیۆن و 195 ملیار و 800 ملیۆن دینار جێبەجێ کراون.
هەر لەم ماوەیەدا کارەکانی ڕاکێشانی تۆڕی ئاوی هەولێر، دانانی تۆڕی ئاو بۆ 51 گوندی دەڤەری بارزان، پڕۆژەی ئاوی پیرمام و دەوروبەری بە گوژمەی گشتیی نزیک 90 ملیار دینار کۆتاییان پێ هاتووە.
کابینەی نۆیەمی حکوومەتی هەرێمی کوردستان لە پێناو مسۆگەرکردنی ئاسایشی ئاو، 9 بەنداوی بە گوژمەی زیاتر لە 265 ملیار دینار دروست کردووە یا خەریکی دروستکردنیانە کە بە گشتی توانای گلدانەوەی 252.8 ملیۆن مەتر سێجا ئاویان هەیە. هەروەها 23 پۆند دروست کراون و 58 پۆندی دیکەش لە جێبەجێکردندان.
ئەم بەنداو و پۆندانە کاریگەرییان لەسەر دابینکردنی ئاوی پاک بۆ هاووڵاتییان، ڕووبەڕووبوونەوەی وشکەساڵی، زیادکردنی بەرهەمی کشتوکاڵی، کەمکردنەوەی لافاو، پشتیوانیی ئاژەڵداران دەبێت.
کۆمێنت (0)
تا ئێستا هیچ کۆمێنتێک نەکراوە.