مەزڵووم عەبدی: هەسەدە وەک گرووپێکی یەکگرتوو لە ناو سوپای سووریادا ڕێک دەخرێت

فەرماندەی هێزەکانی سووریای دیموکرات (هەسەدە) ڕایگەیاند، لەگەڵ حکوومەتی سووریا لەسەر میکانیزمێک بۆ یەکگرتنی هێزەکانیان ڕێک کەوتوون و ئەم ڕێککەوتنە دەیان هەزار سەرباز و هەزاران هێزی ئاسایشی ناوخۆیی باکوور و ڕۆژهەڵاتی سووریا لەخۆ دەگرێت.

مەزڵووم عەبدی لە گفتوگۆیەکدا لەگەڵ ئاژانسی ئاسۆشێتێد پرێس گوتی ئەم هێزانە ناتوانن وەک گرووپە بچووکەکانی دیکە بە تاکەکەسی بچنە ناو سوپای سووریاوە، بەڵکوو وەک پێکهاتەی گەورەی سەربازی کە بە پێی یاساکانی وەزارەتی بەرگری پێکهێنراون، تێکەڵ بە سوپای سووریا دەکرێن.

ئاشکراشی کرد لێژنەیەکیان پێک هێناوە کە لەگەڵ وەزیری بەرگری و بەرپرسانی سەربازیی دیکە کار دەکەن بۆ دیاریکردنی میکانیزمە گونجاوەکان. گوتیشی چاوەڕێی ئەوەیە ئەندامان و فەرماندەکانی هەسەدە کە دەچنە ناو سوپای نیشتمانیی سووریا، پۆستی باڵا لە وەزارەتی بەرگری و فەرماندەیی سوپادا وەربگرن.

عەبدی ڕایگەیاند لە سەفەرێکدا بۆ دیمەشق لە سەرەتای ئەم مانگەدا، لەگەڵ ئەحمەد شەرع و بەرپرسانی تر کۆبووەتەوە، لەوانەش وەزیرانی دەرەوە و بەرگری، کە تیایدا "ڕێککەوتنێکی بنەڕەتی"یان لەسەر میکانیزمی یەکخستنی هەسەدە لەناو سوپادا بەدەست هێناوە.

لێدوانەکانی مەزڵوم عەبدی، فەرماندەی هێزەکانی سوریای دیموکرات کە لەلایەن کوردەوە سەرۆکایەتی دەکرێن و ئەمریکا پشتیوانییان لێ دەکرێت، ئاماژەیەکە بە پێشکەوتنێکی گەورە دوای ئەوەی گفتوگۆکانی نێوان هەسەدە و حکومەتی ناوەندی لە دیمەشق چەندین مانگ بوو وەستابوون.

لە مانگی کانوونی یەکەمدا، گروپە چەکدارەکان بە سەرۆکایەتی گروپە ئیسلامییەکەی هەیئەت تەحریر شام، یان HTS، چوونە ناو پایتەختی دیمەشق و بەشار ئەسەدیان لە دەسەڵات لابرد و ناچاریان کرد بۆ ڕوسیا هەڵبێت. ئەم هێرشە کۆتایی بە پێنج دەیە حوکمڕانی خێزانی ئەسەد هێنا، کە سەر بە کەمینەی عەلەوی بوون، کە لقێکە لە ئیسلامی شیعە.

سەرکردایەتی نوێی سوننە لە دیمەشق بە سەرۆکایەتیی کاتی ئەحمەد شەرع، سەرۆکی پێشووی HTS، لە مانگی ئازاردا ڕێککەوتنێکی لەگەڵ SDF واژۆ کرد، کە زۆربەی باکووری ڕۆژهەڵاتی وڵاتەکە کۆنترۆڵ دەکات.

بەپێی ڕێککەوتنەکە، بڕیار بوو SDF هێزەکانی خۆی لەگەڵ سوپای نوێی سوریا یەکبخات، بەڵام وردەکارییەکان ناڕوون بوون و جێبەجێکردنی دواکەوتووە.

خاڵێکی سەرەکی ئەوە بوو کە ئایا SDF وەک یەکەیەکی یەکگرتوو لە سوپا نوێیەکەدا دەمێنێتەوە یان هێزەکە هەڵدەوەشێنرێتەوە و ئەندامەکانی بە تاکەکەسی لەناو سەربازی نوێدا هەڵدەمژرێن.

عەبدی ڕایگەیاند جێبەجێکردنی ڕێککەوتنەکە لە نێوان دیمەشق و هێزە کوردییەکان دەتوانێت یارمەتی چارەسەرکردنی زۆرێک لە کێشەکانی تری وڵاتەکە بدات کە لە جەنگێکی ناوخۆیی 14 ساڵەدا دەرچووە و نزیکەی نیو ملیۆن کەس تێیدا گیانیان لەدەستدا.

عەبدی لە چاوپێکەوتنەکەیدا لەگەڵ ئەسۆشەیتێدپرێس  ڕایگەیاند کوشتنی کەمینە ئایینییەکان لەلایەن چەکدارانی سەر بە حکومەت و هێزە ئەمنییەکان لە ناوچەی کەنار دەریای سوریا لە مانگی ئازاردا و لە پارێزگای سوەیدای باشوور لە مانگی تەمووزدا، ترس و دڵەڕاوکێی لای زۆرێک لە دانیشتوانی باکووری ڕۆژهەڵاتی سوریا دروست کرد، کە وای لێ کردن لە جێبەجێکردنی ڕێککەوتنەکە دوودڵ بن.

فەرماندەی گشتیی هەسەدە گوتی: "ئەمە یەکێک بوو لە هۆکارەکانی دواکەوتنی جێبەجێکردنی ڕێککەوتنی 10ی ئازار بوو." جەختیشی کردەوە" ئەگەر پێشکەوتن لە ڕێککەوتنی ئازاردا ڕووبدات و هەموو بڕگەکانی بە شێوەیەکی کرداری جێبەجێ بکرێن، ئەوا دەتوانین ڕێگری لە دووبارەبوونەوەی ئەم ڕووداوانە بکەین."

مەزڵووم عەبدی ڕایگەیاند بۆ ئەوەی لە داهاتوودا ڕێگری لەو کوشتیار ئایینییانە بکرێت، پێویستە ڕێککەوتنێک بکرێت کە تیایدا هەموو سورییەکان مافی یەکسانیان هەبێت و بەشداری لە بنیاتنانی دەوڵەتەکەدا بکەن.

عەبدی ڕایگەیاند کە هەسەدە پشتگیری لە فۆرمێکی لامەرکەزیی حکومەت دەکات "کە دەسەڵاتەکان لە نێوان ناوەند و پارێزگاکاندا دابەش دەکرێن" لەناو دەوڵەتێکی یەکگرتوودا. حکوومەتی ناوەندی لە دیمەشق ترسی لەوە هەبوو کە لامەرکەزییەت ببێتە هۆی دابەشبوونی کردەیی وڵاتەکە.

عەبدی وتیشی جێبەجێکردنی ڕێککەوتنی ئازار بە واتای ئەوە دێت کە هەموو دامەزراوە مەدەنی، ئابووری و سەربازییەکان لە باکووری ڕۆژهەڵاتی سوریا لەگەڵ دەسەڵاتی دیمەشقدا یەکدەگرن.