ئەنجوومەنی باڵای دادوەریی عێراق، لە ڕاگەیێندراوێکدا هۆشداریی دایە سەرجەم بەربژێرانی هەڵبژاردنی ئەنجوومەنی نوێنەران و داوایان لێ دەکات خۆیان بەدوور بگرن لە بەکارهێنانی گوتاری دووبەرەکی و سووکایەتیکردن بە ڕکابەرەکانیان، هاوکات جەخت دەکاتەوە کە هەر سەرپێچییەک ڕووبەڕووی سزای یاسایی و بێبەشبوون لە هەڵبژاردن دەبێتەوە.
ئەمڕۆ چوارشەممە 13ـی ئاب، ئەنجومەنی باڵای دادوەریی عێراق لە ڕاگەیێندراوێکدا ڕایگەیاند: هاوکات لەگەڵ نزیکبوونەوەی وادەی هەڵبژاردنی ئەنجوومەنی نوێنەران، لەم دواییانەدا تێبینیی دەرکەوتنی هەندێک بەربژێر لە بۆنە و گردبوونەوەکانی بانگەشەدا کراوە، کە زمانێک بەکاردەهێنن کە لە ڕووی یاساییەوە قبووڵکراو نییە و دووبەرەکی لەنێوان ڕۆڵەکانی یەک نیشتماندا دروست دەکات، یان سووکایەتی بە بەربژێرانی دیکە دەکەن لە دەرەوەی چوارچێوەی کێبڕکێی هەڵبژاردن.
ئەنجوومەنەکە جەختی کردووەتەوە کە ئەم ڕەفتارانە پێچەوانەی دەستوور و یاسا و ڕێنوێنییە کارپێکراوەکانە و هۆشداریی داوە کە ئەگەری هەیە ئەو بەربژێرانە بەپێی یاسا لە بەشداریکردن لە هەڵبژاردن بێبەش بکرێن.
ئەنجوومەنی باڵای دادوەری داوا لە هەموو بەربژێران دەکات، چ بە شێوەی تاک و چ وەک حزب، خۆیان لەم جۆرە گوتار و لێدوانانە بەدوور بگرن، کە بە وردی چاودێری دەکرێن و ڕێکاری یاسایی پێویست بەرامبەر هەرکەسێک دەگیرێتەبەر کە ئەو کارە بکات.
کۆمێنت (0)
تا ئێستا هیچ کۆمێنتێک نەکراوە.