وەزارەتی دارایی و ئابووریی حکوومەتی هەرێمی کوردستان لە ڕاگەیێندراوێکدا، سەرجەم ئەو هەواڵ و زانیاریانە ڕەت دەکاتەوە کە لە ماوەی ڕابردوودا بە ناوی وەزیری دارایی و سەرچاوەی تایبەتەوە لەسەر پرسی مووچە و داهات بڵاوکراونەتەوە. هاوکات هۆشداری دەداتە ئەو میدیایانە و ڕایدەگەیەنێت، کە ڕێکاری یاساییان بەرامبەر دەگرێتەبەر.
ئەمڕۆ چوارشەممە 30ـی تەمووز، وەزارەتی دارایی و ئابووریی حکوومەتی هەرێمی کوردستان ڕاگەیێندراوێکی بڵاوکردەوە و تێیدا ئاماژەی بەوە کردووە، ماوەیەکە چەندین میدیا و دەزگای ڕاگەیاندن و پەیجی ڕۆژنامەوانی کەوتوونەتە بڵاوکردنەوەی هەواڵی ناڕاست و چەواشەکارانە بە ناوی وەزیری دارایی و سەرچاوەی تایبەتەوە لەسەر پرسی مووچە، داهاتی ناوخۆ و کێشەکانی نێوان هەرێمی کوردستان و حکوومەتی فیدراڵی.
وەزارەتی دارایی بۆ ڕای گشتی ڕوونی کردووەتەوە کە "هەموو ئەو لێدوان و هەواڵانەی بەناوی وەزیری دارایی بڵاو کراونەتەوە سەرجەمیان درۆیەکی پەتییە".
هەروەها جەختی لەوەش کردووەتەوە کە وەزیری دارایی و ئابووری ماوەی نزیکەی دوو مانگە هیچ لێدوانێکی بۆ هیچ دەزگایەکی ڕاگەیاندن نەداوە.
لە کۆتایی ڕاگەیێندراوەکەدا، وەزارەتی دارایی هۆشداریی داوە و دەڵێت: "هەر دەزگا و سایت و پەیجێکیش هەواڵی ناڕاست بە ناوی وەزیری دارایی و وەزارەت بڵاو بکاتەوە ناچارین ڕووبەڕووی یاسایان بکەینەوە".
کۆمێنت (0)
تا ئێستا هیچ کۆمێنتێک نەکراوە.