سەرۆکی فراکسیۆنی پارتی لە ئەنجومەنی پارێزگای کەرکووک ڕایگەیاند، لە کۆی 776 پاسەوانی ئەمنی کە بۆ کۆمپانیای نەوتی باکوور دامەزراون، ناوی هیچ هاووڵاتییەکی کورد لە لیستەکەدا نییە و جەخت دەکاتەوە کە ئەمە یەکەمجار نییە کورد لە دامەزراندندا پشتگوێ دەخرێت.
حەسەن مەجید، سەرۆکی فراکسیۆنی پارتی لە ئەنجومەنی پارێزگای کەرکووک بە هەڵۆ جەباری پەیامنێری (کوردستان تیڤی) ڕاگەیاند: "لە کۆمپانیای نەوتی باکوور ناوی 776 پاسەوانی ئەمنی گەڕاوەتەوە و ئەوەی جێگەی نیگەرانیی ئێمەیە، لەو ژمارەیەشدا هیچ کوردێكی تێدا نییە."
ناوبراو گوتیشی: "تێبینیی تەواومان لەسەر ئەم بابەتە کردووە، ماوەیەک بەر لە ئێستاش بە چەند قۆناغێک ژمارەیەک پاسەوان دامەزران و لە لیستەکاندا هیچ کوردێکی تێدا نەبوو."
سەبارەت بە هۆکاری ئەم بڕیارە و پشتگوێخستنی کورد، حەسەن مەجید ئاماژەی بەوە کرد کە لە وەڵامدا پێیان گوتراوە: "بڕیارەکە گشتییە و بەغدا، مووسڵ و ئەنباریش دەگرێتەوە و تەنیا تایبەت نییە بە کەرکووک."
سەرۆکی فراکسیۆنی پارتی لە ئەنجومەنی پارێزگای کەرکووک جەختی لەوەش کردەوە کە بەدواداچوونی زیاتر بۆ ئەم پرسە دەکەن و لەسەری بەردەوام دەبن.
کۆمێنت (0)
تا ئێستا هیچ کۆمێنتێک نەکراوە.