هەردوو حكوومەتی ئەمەریكا و عێراق كشانەوەی كارمەندانی باڵیۆزخانەی ئەمەریكایان لە شاری بەغدا پشتڕاستكردەوە و رایانگەیاند، بڕیارەكە لەچوارچێوەی پلانەكانی ئیدارەی ئەمەریكایە بۆ كەمكردنەوەی قەبارەی نێردە دیپلۆماسییەكان لە ژمارەیەك وڵاتانی جیهان.
ئەمڕۆ چوارشەممە (ئاژانسی رۆیتەرز) لەسەر زاری دوو بەرپرسی باڵای ئەمەریكا بڵاوی كردەوە: ئەمەریكا ئامادەكاری دەكات بەشێك لە كارمەندانی باڵیۆزخانەی وڵاتەكەی لە بەغدا بكشێنێتەوە بەهۆی ئەگەری زۆربوونی گرژییەكان لە ناوخۆی عێراقدا.
لەمبارەیەوە، وەزارەتی بەرگریی ئەمەریكا رایگەیاند: هەواڵەكە راستە و بڕیاردراوە بەشێك لە كارمەندانی باڵیۆزخانەی ئەمەریكا لە بەغدا بكشێنرێنەوە.
راشیگەیاند: بڕیارەكە لەچوارچێوەی پلانەكانی دۆناڵد ترەمپ سەرۆكی ئەمەریكایە كە بڕیاریداوە بۆ پاراستنی سەلامەتیی گیانی ئەمەریکییەکان، هەڵسەنگاندن بۆ دۆخی کارمەندان لە دەرەوەی وڵات و باڵیۆزخانەكان بكرێت و بەپێی پێویست ژمارەیان كەم بكرێتەوە.
لەلایەكی دیكەوە حكوومەتی عێراق لە راگەیەنراوێكدا بڵاوی كردەوە: بڕیارەكە بریتییە لە كشانەوەی بەشێك لە كارمەندە ناپێویستەكان لە باڵیۆزخانەی ئەمەریكا لە بەغدا.
بڵاویشی كردەوە: ئەم هەنگاوە لەچوارچێوەی پلانەكانی ئیدارەی ئەمەریكایە بۆ كەمكردنەوەی ژمارەی كارمەندە دیپلۆماسییەكان لە بەشێك لە وڵاتانی رۆژهەڵاتی ناوەڕاست و جیهان و تەنیا بۆ عێراق نییە.
حكوومەتی عێراق لە راگەیەنراوەكەدا ئاماژەی بەوەش دا كە بڕیارەكە پەیوەندی بە ناسەقامگیری و دۆخی ئەمنیی بەغداوە نییە، بەپێچەوانەوە كارمەندانی سەرجەم باڵیۆزخانە عەرەبی و بیانییەكان لە عێراق لەوپەڕی سەلامەتی و بە ئازادی كارەكانیان ئەنجام دەدەن.
کۆمێنت (0)
تا ئێستا هیچ کۆمێنتێک نەکراوە.