لە رووداوێکدا ئۆتۆمبێڵیک خۆی دەکات بە ناو هاندەرانی یانەی لیڤەرپول و لە ئەنجامدا 27 کەس بریندار دەبن، پۆلیسی بەریتانیاش رەتی دەکاتەوە بە ئامانجی تیرۆریستی ئەنجامدرابێت و دەڵێت تەنیا رووداوێک بووە.
ئەمرۆ سێشەممە 27ی ئایاری 2025، پۆلیسی بەریتانیا بەفەرمی بڵاویکردەوە: "دڵنیاین، ئەوەی دوێنێ روویدا تەنیا رووداوێک بووە و هیچ ئامانجێکی تیرۆریستی لەپشت نەبووە".
شەوی رابردوو یانەی لیڤەرپولی ئینگلیزی بووە براوەی پرێمەرلیگی ئەمساڵ و دوای بردنەوەی ناسناوەکە لەلایەن هاندەرانی یانەکە خۆشی و شاییان گواستەوە بۆ دەرەوەی یاریگا و لەیەکێک لە شەقامەکانی لیڤەرپول خەریکی ئاهەنگ گێڕان بوون، خۆشی و شادییەکە بە رووداوێکی خۆپێدادانی ئۆتۆمبێلێک بە چەند هاووڵاتییەک کۆتایی هات و هەوادارانی یانەکەی توشی ترس و دڵەراوکێ کرد.
دوای رووداوەکە تیمەکانی پۆلیس و هەلیکۆپتەری و ئۆتۆمبێلی فریاکەوتن گەیشتنە شوێنی رووداوەکە و بریندارەکانیان بۆ نەخۆشخانەی ئەو شارە گواستەوە.
پۆلیسی مێرزیساید دەڵێت: "ئەو شۆفێرەی خۆی بەناو خەڵکدا کردووە دەستگیر کراوە و هەوڵی راکردنی نەداوە، شۆفێرەکە پیاوێکی تەمەن 53 ساڵە و هیچ پێشینەیەکی تاوانی نییە".
کیەر ستامەر، سەرۆکوەزیرانی بەریتانیا رووداوەکەی بە "ترسناک" ناوبردووە و سوپاسی پۆلیسی فریاکەوتنی وڵاتەکەی کرد لەبەر زوو گەیاندنی برینداران و رزگارکردنی گیانیان.
کۆمێنت (0)
تا ئێستا هیچ کۆمێنتێک نەکراوە.