ئیلۆن ماسک دەوڵەمەندترین سەرمایەداری جیهانە و پەیوەندییەکی فراوانی هەیە، هەر کاتیش بیهەوێت بە ئاسانی دەستی دەگاتە بەرپرس و سەرکردەی وڵاتان، بەشێک لە میدیاکانی جیهانیش بە سەرۆکی نافەرمی ئەمەریکا ناوی دەهێنن، بەڵام باوکی لەبارەیەوە بە جۆرێکی دیکە دەدوێت.
ئاژانسی هەواڵی بی بی سی چاوپێکەوتنێکی لەگەڵ ئارۆل ماسک، باوکی ئەو سەرمایەدارە داهێنەرەی بواری تەکنەلۆژیا ئەنجامداوە و تیشکی خستووەتە سەر ژیانی منداڵی و کەسایەتی ئیلۆن ماسک لە قۆناخە جیاوازەکانی ژیانیدا.
ئارۆل ماسک لەبارەی دوایین پەیوەندیی تەلەفۆنی خۆی و ئیلۆن ماسک دەڵێت، رۆژێک پێش ئەنجامدانی ئەم چاوپێکەوتنە قسەمان کرد، "بڕێک پارەم کەم بوو بۆ کڕینی فڕۆکەیەکی تایبەت و ئەویش پارەکەی بۆ ناردم".
ئیلۆن ماسک ساڵی 1971 لە پۆرتۆریۆی پایتەختی ئەفریقای باشور لە دایک بووە، باوکی ئەندازیار بووە و دایکیشی کاری مۆدێلینگی کردووە، دوای ئەوەی دایک و باوکی لە یەکتر جیا بووەنەتەوە، ئیلۆن ماسک تا ساڵی 1989 لە ئەفریقا لەگەڵ باوکی ژیاوە و کە تەمەنی گەیشتووەتە 18 ساڵ چووەتە کەنەدا.
بە گوتەی باوکی، "ئیلۆن ماسک کوڕێکی باش و یەکجار بێ کێشە بوو، لە منداڵییەوە خووی دابایە سەر هەر بوارێک، تاوەکو تێیدا یەکەم نەبووبا کۆڵی نەدەدا و هەر شتێکی ئەویست بەدەستی دەهێنا".
ئیلۆن ماسک خاوەنی کۆمپانیاکانی تێسلا، سپەیس ئێکس و ئێکسە و سەرمایەکەی بە 419 ملیار دۆلار مەزەندە دەکرێت، ئێستاش راوێژکاری سەرۆکی ئەمەریکایە و سەرپەرشتیاری دۆج، واتا بەڕێوەبەرایەتی کارامەیی حکومەت دەکات.
باوکی ئیلۆن ماسک گومانی هەیە کوڕەکەی بتوانێت لە سیاسەت دا هاوشێوەی بواری تەکنەلۆجیا و بازرگانیی سەرکەوتوو بێت و لەبارەی ئەوەی کوڕەکەی لە بەردەم میدیاکاران سەرۆکی پۆڵەندای بە "گەمژە" ناو برد، دەڵێت: "من نیگەرانی وشە بە وشەی کوڕەکانمم، لەبەر ئەوەی دەترسم تووشی سەرئێشە ببنەوە".
دەشڵێت؛ "کاتێک زۆر منداڵ بوو پێم دەگوت نابێ بە گەورەتر لە خۆت بڵێی گەمژە، بەڵام ئەو دەیگوت: بۆ؟ خۆ ئەوان بە راستی گەمژەن. منیش دەمگوت راستە ئەوان گەمژەن، بەڵام تۆ نابێ وایان پێ بڵێیت. هەرچەند دنیای سیاسەت بەرزی و نزمی زۆری تێدایە و کەسەکان رەنگە رۆژێک سووکایەتی بە یەکتر بکەن و رۆژی دواتر هاوپەیمانیی پێک بهێنن".
سەرباری ئەوەی ئیلۆن ماسک دەستوپەیوەندییەکی فراوانی لە دنیای سیاسەت و دەسەڵاتدا هەیە، بەڵام دیسانیش باوکی پێی وایە بۆ سیاسەت گونجاو نییە و دەڵێت: "ئیلۆن پیاوی جیهانی تەکنەلۆجیایە، ئەوانەش لەو جیهانەدا کار دەکەن حەزیان لێیە هەموو شتێک لۆجیکی بێت، بەڵام ئیلۆن لە هەڵسوکەوتکردن لەگەڵ هەموو جۆرە کەسایەتییەکدا کێشەی هەیە، لە سیاسەتدا دەبێت لەگەڵ کەسانێک کار بکەیت کە تەنیا بەهۆی پێگە یان هەلومەرجێکی تایبەتەوە جەماوەریان هەیە، بەڵام لەوانەیە زۆر گەمژە بن".
لە کۆتاییدا ئارۆل ماسک لەبارەی کوڕەکەیەوە دەڵێت: "نهێنییەک هەیە کە رەنگە خەڵک نەیزانن، ئیلۆن ماسک کە بیهەوێت لەناو کۆمەڵێکدا قسە بکات، بایی ئەوەندە متمانەی بەخۆی نییە، لە کاتی قسەکردندا شەرم دەکات. ئێستاش دەبێ راهێنان بکات و فێر ببێت کە چۆن لەنێو کۆمەڵێک خەڵکدا قسە بکات، هەر شتێکی بە خەیاڵدا دێت بۆ گوتن، بە خێرایی دەریدەبڕێت".
کۆمێنت (0)
تا ئێستا هیچ کۆمێنتێک نەکراوە.