سەرۆکی هەرێمی کوردستان بە بۆنەی 45ـەمین ساڵیادی جینۆسایدکردنی کوردی فەیلی پەیامێکی بڵاوکردەوە و رایگەیاند، تەنها لەبەر ئەوەی کوردن و پشتیوانیی شۆڕشی کوردستانیان کرد، ڕووبه‌ڕووی کوشتن و راگواستن بوونەوە.
رۆژی هەینی 4ـی نیسانی 2025، نێچیرڤان بارزانی، سەرۆکی هەرێمی کوردستان بەبۆنەی 45ـەمین ساڵیادی جینۆسایدکردنی کوردی فەیلی پەیامێکی بڵاوکردەوە.
دەقی پەیامەکەی نێچیرڤان بارزانی
ئەمڕۆ یادی پڕ له ئازاری چل و پێنجەمین ساڵڕۆژی جینۆسایدی هەزاران کوردی فەیلی ده‌که‌ینه‌وه کە لە هەڵمەتێکی دڕندانەی رژێمی ئەوکاتی عێراقدا، رووبه‌ڕووی کوشتن و دەستگیرکردن و راگواستن و ونکردن و لێسەندنەوەی رەگەزنامە و دەستبەسەرداگرتنی ماڵ و سامانیان بوون، تەنها لەبەر ئەوەی کوردن و پشتیوانیی شۆڕشی کوردستانیان کرد.
لەم یادەدا، جەخت لەسەر داواکاریمان لە حکوومەتی فیدراڵی عێراق دەکەینەوە بەپێی بڕیاری دادگای باڵای تاوانه‌کانی عێراق کە ئەو تاوانەی به جینۆساید ناساندووه، کوردە فەیلییەکان لە هەموو روویەکەوە قەرەبوو بکاتەوە و رەگەزنامە و ماڵ و سامانیان بۆ بگەڕێنێتەوە و کێشەکانیان چارەسەر بکات. خوشک و برایانی فه‌یلیمان دڵنیا ده‌که‌ینه‌وه که هەمیشە بەردەوام دەبین لە هەوڵەکانمان بۆ گێڕانه‌وه‌ی مافه‌کانیان و به‌دیهینانی دادوه‌ری بۆ ئه‌وان و هەرچی پێویستە لەم بارەیەوە، درێخی ناکه‌ین.
جینۆسایدی کوردانی فەیلی و هەموو هەوڵەکانی سڕینەوە و ئه‌و تاوانانه‌ی دژی گەلی کوردستان ئەنجام دراون، مێژوویەکی رەش و رابردوویەکی تاڵن کە جگه له نەهامەتی و ناسەقامگیری بۆ وڵات هیچی تری نه‌هێناوە. ده‌بێ ئەو رابردووە ببێتە پەند و وانه بۆ به‌دیهێنانی داهاتوویەکی باشتر کە لەسەر بنەمای لێکگەیشتن و هاوبەشی و قبووڵکردنی یەکتر و پاراستنی مافی هه‌موو پێکهاته‌کان لە عێراقدا بنیات نرابێت.
سڵاو و دروود بۆ یادی شەهیدانی کوردی فەیلی و هەموو شەهیدانی کوردستان.
نێچیرڤان بارزانی
سەرۆکی هەرێمی کوردستان
کۆمێنت (0)
تا ئێستا هیچ کۆمێنتێک نەکراوە.